Yevropa Chempionlar ligasining hal qiluvchi final bahsi oldidan futbol olamida qiziq muhokamalar avj olmoqda. Ayniqsa, mashhur tahlil platformalari va superkompyuterlar bergan prognozlar muxlislar e’tiborini o‘ziga jalb qilyapti.
Qiziq jihati shundaki, Opta Analyst tahlilchilari va superkompyuter hisob-kitoblariga ko‘ra, Angliyaning “Arsenal” klubi ushbu mavsumda bosh sovrinni qo‘lga kiritish uchun asosiy favorit sifatida baholanmoqda. Londonliklar imkoniyati 55,76 foiz deb ko‘rsatilgan.
Fransiyaning “Pari Sen-Jermen” jamoasiga esa 44,24 foizlik ehtimol berilgan. Bu esa finalda kuchlar deyarli teng ekanini ko‘rsatadi.
Eng qizig‘i, agar Mikel Arteta shogirdlari g‘alaba qozonsa, “Arsenal” o‘z tarixida ilk bor Chempionlar ligasi bosh sovrinini qo‘lga kiritadi. Shu sababli bu final klub va uning millionlab muxlislari uchun haqiqiy tarixiy imkoniyat sifatida baholanmoqda.
Bu mavsum “kanonirlar” Yevropa arenasida juda ishonchli harakat qildi. Jamoa yarimfinalda Ispaniyaning tajribali va mustahkam “Atletiko” klubini musobaqadan chiqarib yubordi. Madriddagi birinchi bahs 1:1 hisobida yakunlangan bo‘lsa, Londondagi javob uchrashuvida “Arsenal” minimal hisobda g‘alaba qozondi.
“PSJ” esa finalgacha bo‘lgan yo‘lda Germaniya grandi — “Bavariya”ni taslim qildi. Parijda kechgan birinchi uchrashuv gollarga boy o‘tib, 5:4 hisobida fransuz klubi foydasiga hal bo‘ldi. Javob bahsida esa 1:1 hisobi qayd etildi.
Mutaxassislar fikricha, finalda tajriba, bosimga chidam va mayda detallar hal qiluvchi ahamiyat kasb etadi. Bir tomonda Luis Enrike kabi katta finallarda ishlagan tajribali murabbiy bo‘lsa, ikkinchi tomonda yosh va ambitsiyali Mikel Arteta turibdi.
Eslatib o‘tamiz, UYEFA Chempionlar ligasi finali 30 may kuni Vengriya poytaxti Budapesht shahridagi mashhur “Pushkash Arena” stadionida bo‘lib o‘tadi. Futbol muxlislarini Yevropa mavsumining eng katta va eng dramatik to‘qnashuvlaridan biri kutib turibdi.
“Zamin”ni Telegramʻda oʻqing!
