Madridning mashhur «Real» klubida yozgi transferlar oynasi oldidan jiddiy o‘zgarishlar kutilmoqda. Ispaniya matbuoti tarqatgan ma’lumotlarga ko‘ra, klub prezidenti Florentino Peres jamoada keng ko‘lamli islohotlarni amalga oshirish niyatida.
The Touchline manbasi xabariga qaraganda, «qaymoqranglilar» rahbari jamoa ichida yuzaga kelgan muammolar, salbiy muhit va doimiy tanqidlardan qattiq norozi bo‘lib qolgan. Shu sababli ayrim futbolchilar bilan xayrlashish varianti ham jiddiy ko‘rib chiqilmoqda.
Ma’lum qilinishicha, Peres nafaqat maydondagi natijalar, balki klub atrofida shakllangan nosog‘lom muhitdan ham tashvishda. Ayniqsa, so‘nggi haftalarda jamoaning o‘yini, ayrim futbolchilarning harakatlari va kiyinish xonasidagi vaziyat muxlislar hamda ommaviy axborot vositalari tomonidan keskin tanqid qilinmoqda.
Shu bilan birga, «Real» uchun mavsum juda omadsiz yakunlanishi ehtimoli ham yo‘q emas. Madridliklar Chempionlar ligasi va boshqa musobaqalarda kutilgan natijani qayd eta olmaganidan keyin, endi butun e’tibor La Ligaga qaratilgan.
Biroq vaziyat juda murakkab. Jamoa chempionlik poygasida qolish uchun azaliy raqib — «Barselona»ga qarshi bo‘ladigan navbatdagi «el-klasiko»da albatta g‘alaba qozonishi shart. Aks holda, madridliklar hatto matematik jihatdan ham chempionlik imkoniyatini yo‘qotadi.
Bu esa klub rahbariyati uchun katta zarba bo‘lishi mumkin. Chunki «Real» kabi dunyo grandi har bir mavsumda sovrinlar uchun kurashishga odatlangan. Sovrinsiz yil esa nafaqat muxlislar, balki rahbariyat uchun ham qabul qilib bo‘lmas holat sifatida baholanmoqda.
Ayni paytda futbol jamoatchiligi Peres qanday qarorlar qabul qilishini katta qiziqish bilan kuzatmoqda. Mutaxassislar fikricha, yozda tarkibda jiddiy o‘zgarishlar bo‘lishi va ayrim mashhur futbolchilar klubni tark etishi ehtimoli yuqori.
“Zamin”ni Telegramʻda oʻqing!
