Marsel hujumchisi Per-Emerik Obameyang yongʻin oʻchirgich bilan bogʻliq mojaro sabab chetlatildi
Marsel hujumchisi Per-Emerik Obameyang klub mashgʻulot bazasida yuz bergan gʻayritabiiy voqea ortidan jamoa tarkibidan chiqarildi. Tajribali futbolchi yakshanba kuni Le Gavrga qarshi boʻlib oʻtadigan uchrashuv qaydnomasiga kiritilmadi. Bu haqda Goal.com xabar beradi.
L’Équipe nashri xabariga koʻra, Obameyang payshanba oqshomida jamoa qarorgohida tartibsizlik keltirib chiqargan guruhga boshchilik qilgan. Futbolchilarning bazada uzoq vaqt qolib ketishdan noroziligi sababli, hujumchi vaziyatni yumshatish maqsadida 10 nafarga yaqin oʻyinchi bilan birga binoda shovqin koʻtargan.
Vaziyat kutilmaganda jiddiy tus olgan. Guruh aʼzolari yongʻin oʻchirgichdan foydalanib, uni klub sport maʼmuriyati vakili Bob Taxriga qarata purkagan. Shuningdek, rasmiy shaxsning yotoqxonasi va shaxsiy buyumlari ham zarar koʻrgan.
Ushbu voqeadan gʻazablangan Taxri darhol klub rahbariyatiga shikoyat qilgan. Marsel rahbariyati intizomni buzganlikda ayblab, guruh yetakchisi sifatida aynan Obameyangni jazolashga qaror qildi.
Klub prezidentlari Alban Juster va Stefan Rishar jamoa bilan uchrashuv oʻtkazib, bunday xatti-harakatlarga yoʻl qoʻyilmasligini taʼkidladi. Obameyangning tarkibdan chetlatilishi jamoada qatʼiy intizom oʻrnatish yoʻlidagi ilk qadam boʻldi.
“Zamin”ni Telegramʻda oʻqing!
