PSJ bosh murabbiyi Luis Enrique Chempionlar ligasi yarim finalida Bavariyaga qarshi kechgan javob uchrashuvida darvozabon Matvey Safonov qo‘llagan g‘ayritabiiy taktika haqidagi savollarga javob berishdan bosh tortdi. Parijliklar umumiy 6:5 hisobida g‘alaba qozonib, final yo‘llanmasini qo‘lga kiritgan bo‘lsa-da, darvozabonning to‘pni ataylab maydon tashqarisiga tepishi ko‘pchilikda savol uyg‘otdi. Bu haqda Goal.com xabar beradi.
Tahlillarga ko‘ra, bu shunchaki xato emas, balki Vincent Kompany shogirdlarining hujumga o‘tishini to‘xtatish uchun ishlab chiqilgan maxsus reja bo‘lgan. Safonov to‘pni yon chiziqdan tashqariga chiqarib yuborish orqali Bavariya futbolchilariga tezkor qarshi hujum uyushtirish imkonini bermadi va PSJ himoyachilariga o‘z joylarini egallab olish uchun vaqt taqdim etdi.
Ushbu taktika ayniqsa Michael Oliseni zararsizlantirishda qo‘l keldi. Birinchi o‘yinda gol urgan fransiyalik vinger javob bahsida deyarli ko‘rinmay qoldi va PSJ himoyasi unga erkin harakatlanish uchun bo‘sh hudud qoldirmadi. Luis Enrique esa bu detallar jurnalistlar uchun qiziq bo‘lishi mumkinligini, biroq u raqiblariga o‘z sirlarini ochib bermasligini ta’kidladi.
Endilikda PSJ Budapeshtda bo‘lib o‘tadigan Chempionlar ligasi finalida Arsenal jamoasiga qarshi maydonga tushadi. Parijliklar ushbu bahsda g‘alaba qozonib, zamonaviy futbol tarixida sovrinni ketma-ket ikki marta himoya qilgan ikkinchi jamoaga aylanishni maqsad qilgan.
“Zamin”ni Telegramʻda oʻqing!
