"Barselona" jamoasining sobiq vingeri Pedro faoliyati davomida Lionel Messi va David de Gea kabi yulduz jamoadoshlarini Italiyaning Latsio klubiga oʻtishga koʻndirishga harakat qilganini ochiqladi. 38 yoshli ispaniyalik futbolchi shanba kuni A Seriya klubi safidagi soʻnggi oʻyinini oʻtkazdi va Rimdagi faoliyati davomida amalga oshirgan transfer urinishlari haqida soʻzlab berdi. Bu haqda Goal.com xabar beradi.
Pedro Latsio safida "Piza"ga qarshi kechgan xayrlashuv uchrashuvida gol urib, jamoasining gʻalabasiga hissa qoʻshdi. Klubning rasmiy YouTube kanaliga bergan intervyusida u Italiya poytaxtidagi sarguzashtlari yakuniga yetganini tasdiqladi. Rimliklar safida jami 209 ta oʻyinda maydonga tushib, 39 ta gol urgan faxriy futbolchi uchun bu mavsum biroz omadsiz keldi — jamoa A Seriyada toʻqqizinchi oʻrinni egallab, yevrokuboklardan quruq qoldi.
Maydondagi harakatlaridan tashqari, Pedro norasmiy ravishda "seleksioner" vazifasini ham bajarganini tan oldi. U Lionel Messi, David de Gea va Jordi Alba kabi yulduzlarni Latsio safiga olib kelishga uringan. "Men doim harakat qilganman. Hatto Messi bilan ham gaplashganman, lekin bu oson emas edi (kuladi). Keyin Jordi Alba va David de Gea erkin agent boʻlgan vaqtlarida ularni chaqirdim. Shuningdek, Sarri bilan Bartra va David Luiz haqida ham gaplashganim yodimda", — deydi Pedro.
Pedro Italiya futbolini dunyoning eng sovrindor oʻyinchilaridan biri sifatida tark etmoqda. U Ispaniya terma jamoasi bilan Jahon chempioni va Yevropa chempioni boʻlgan. Klub miqyosida esa "Barselona" bilan uch marta Chempionlar ligasi, beshta La Liga va ikkita Klublar oʻrtasidagi jahon chempionligini qoʻlga kiritgan. Shuningdek, Chelsi safida Angliya Premer-ligasi va Yevropa ligasida zafar quchgan.
Hozircha faxriy vinger keyingi manzili qayer boʻlishini maʻlum qilmadi. Xayrlashuv xabarida u klub, muxlislar va jamoani birlashishga chaqirdi. "Ishonchim komilki, bir necha yildan soʻng Latsio yana sovrinlar uchun kurashadigan va Yevropada oʻz soʻzini aytadigan darajaga qaytadi. Umid qilamanki, bir kun kelib jamoaga yordam berish uchun qaytaman", — deya qoʻshimcha qildi ispaniyalik yulduz.
“Zamin”ni Telegramʻda oʻqing!
