Match Group kompaniyasi birinchi chorakdagi moliyaviy hisobotida Tinder ilovasining tiklanish jarayoni boshlanganini maʼlum qildi. Biroq, kompaniya moliyaviy direktori Steven Bailey eʼtiborni boshqa muhim jihatga qaratdi: kompaniya sunʼiy intellekt vositalariga sarflanadigan xarajatlarni qoplash uchun yangi xodimlarni yollash jarayonini sekinlashtirmoqda. Bu haqda Techcrunch.com xabar beradi.
Steven Bailey kompaniyani toʻliq "AI-native" (sunʼiy intellektga asoslangan) tashkilotga aylantirish niyatida ekanligini taʼkidladi. Shu maqsadda har bir xodimga eng zamonaviy texnologiyalardan foydalanish imkoniyati va tegishli treninglar taqdim etilmoqda. Biroq, ushbu vositalarning yuqori narxi kompaniyani kadrlar siyosatida oʻzgarishlar qilishga majbur qildi.
Kompaniya rahbariyati ishga qabul qilish surʼatining kamayishi va dasturiy taʼminot xarajatlarining oshishi oʻzaro muvozanatlashishini kutmoqda. Match Group sunʼiy intellekt yordamida xodimlarning unumdorligi oshishi va bu kelajakda daromadlar oʻsishiga xizmat qilishiga umid qilmoqda.
Tinder ilovasi soʻnggi yillarda foydalanuvchilar sonining kamayishi bilan bogʻliq qiyinchiliklarga duch kelgan edi. Joriy chorakda faol foydalanuvchilar sonining pasayishi sekinlashgani va roʻyxatdan oʻtishlar soni biroz oʻsgani ijobiy signal sifatida baholanmoqda, ammo bu oʻzgarishlar barqaror boʻladimi yoki vaqtinchalik holatmi, buni vaqt koʻrsatadi.
“Zamin”ni Telegramʻda oʻqing!
