2017-yil avgust oyi oxirida OpenAI kompaniyasining asoschilari texnologiyalarni tijoratlashtirish va sunʼiy umumiy intellekt (AGI) yaratish uchun mablagʻ jalb qilish masalasini muhokama qilishdi. Oʻsha paytda Elon Musk kompaniya ustidan toʻliq nazoratni oʻz qoʻliga olishni talab qilgan edi. CTO Greg Brockman Muskning hamkorlariga Tesla Model 3 avtomobillarini sovgʻa qilishini ularni oʻz tomoniga ogʻdirishga urinish deb baholadi. Bu haqda Techcrunch.com xabar beradi.
Yigʻilishda Ilya Sutskever Muskga doʻstona ishora sifatida Tesla tasvirlangan suratni sovgʻa qilmoqchi boʻldi, biroq vaziyat keskin tus oldi. Musk kompaniya ustidan nazoratni qoʻlga kirita olmasligini tushungach, gʻazabga mindi va "Men rad etaman" deb xonani tark etdi. U hatto Brockmanga tahdidli ohangda "Qachon OpenAI'dan ketasiz?" deya savol berdi.
Musk ushbu voqeadan soʻng kompaniyaga moliyaviy yordam berishni toʻxtatdi va olti oy ichida direktorlar kengashini tark etdi. Shunga qaramay, u 2020-yilgacha Neuralink bilan birgalikda foydalanilgan ofis xarajatlarini toʻlab berdi. Hozirgi kunda OpenAI va Musk oʻrtasidagi sud jarayonlari 2017-yildagi ushbu kelishmovchiliklar atrofida kechmoqda.
Greg Brockman sud jarayonida oʻzining shaxsiy kundaliklariga tayanib koʻrsatma berdi. U Musk bilan boʻlgan bu kurashni "juda ogʻriqli" deb atadi. Sudga taqdim etilgan xabarlardan birida Musk Brockman va Sam Altman'ni "Amerikadagi eng nafratlangan odamlarga aylanishlari" bilan tahdid qilgani maʼlum boʻldi.
“Zamin”ni Telegramʻda oʻqing!
