Silikon vodiysining nufuzli yakka tartibdagi investorlaridan biri Lachy Groom Hindistonning Pronto startapiga sarmoya kiritishga qaror qildi. U 24 yoshli asoschi Anjali Sardana bilan bo‘lib o‘tgan ilk uchrashuvdanoq, atigi 20 daqiqa ichida 20 million dollar miqdoridagi mablag‘ni yo‘naltirishga rozi bo‘ldi. Ushbu kelishuv natijasida startapning umumiy qiymati 200 million dollarga yetdi. Bu haqda Techcrunch.com xabar beradi.
Bengaluru shahrida joylashgan Pronto uy sharoitidagi xizmatlarni raqamlashtirish va tartibga solish bilan shug‘ullanadi. Lachy Groom startapning operatsion intizomi va jamoaning yuqori salohiyatini yuqori baholadi. Uning so‘zlariga ko‘ra, Sardana va uning jamoasi ushbu sohada misli ko‘rilmagan darajada samarali ish olib bormoqda.
Hindistonda uy xizmatlari bozori jadal rivojlanmoqda. Bank of America tahlillariga ko‘ra, ushbu soha 2030-yilga kelib 15-18 milliard dollarlik bozorga aylanishi kutilmoqda. Hozirda Pronto bozorda 20 foizlik ulushga ega bo‘lib, Snabbit va Urban Company kabi raqobatchilar bilan kurashmoqda.
Pronto o‘z faoliyatini kengaytirishda davom etmoqda va kunlik buyurtmalar sonini 18 mingdan 26 minggacha oshirishga muvaffaq bo‘ldi. Startap foydalanuvchilarning xizmatlardan doimiy ravishda foydalanishini ta’minlashga va mijozlar odatlarini shakllantirishga katta e’tibor qaratmoqda.
“Zamin”ni Telegramʻda oʻqing!
