Hindistonning xususiy uylar va turar joy majmualari uchun quyosh panellarini oʻrnatishga ixtisoslashgan SolarSquare startapi yangi investitsiya raundini jalb qilish boʻyicha muzokaralarning yakuniy bosqichida turibdi. TechCrunch nashri xabariga koʻra, kompaniya 55 million dollardan 60 million dollargacha mablagʻ jalb qilishni rejalashtirmoqda. Natijada startapning bozor qiymati 450–500 million dollar oraligʻida baholanishi kutilmoqda. Bu haqda Ixbt.com xabar beradi.
Ushbu koʻrsatkich kompaniya kapitallashuvining soʻnggi bir yarim yil ichida ikki baravardan koʻproq oʻsganini anglatadi. Maʼlumotlarga koʻra, Lightspeed jamgʻarmasi oʻzining maxsus oʻsish fondi orqali ushbu bitimda yetakchilik qiladi. Avvalroq ushbu fond Razorpay va Zepto kabi yirik loyihalarni qoʻllab-quvvatlagan edi. Shuningdek, amaldagi investor Elevation Capital ham yangi raundda ishtirok etishi kutilmoqda.
Investorlarning bunday qiziqishi Hindiston hukumatining qayta tiklanuvchi energiya sohasidagi ulkan maqsadlari bilan bogʻliq. Mamlakat 2030-yilga kelib muqobil energiya quvvatini 500 GWga yetkazishni rejalashtirgan. Hozirda Hindiston quyosh energiyasi ishlab chiqarish boʻyicha Xitoy va AQSHdan keyin dunyoda uchinchi oʻrinni egallab turibdi. Davlat subsidiyalari tufayli xususiy sektorning quyosh panellariga boʻlgan talabi keskin ortgan.
2015-yilda Mumbayda asos solingan SolarSquare oʻzini toʻliq siklli raqamli platforma sifatida namoyon etmoqda. Kompaniya quyosh tizimlarini loyihalash, oʻrnatish va ularga xizmat koʻrsatish bilan mustaqil shugʻullanadi. Bugungi kunda startap Hindistonning 29 ta shahrida faoliyat yuritadi va 50 000 ga yaqin xususiy xonadonlarni toza energiya bilan taʼminlagan.
Kompaniya rahbariyati soʻnggi yillarda asosiy eʼtiborni daromadi yuqori boʻlgan turar joy sektoriga qaratdi. Hozirda ushbu segmentdan keladigan yillik tushum 10 milliard rupiydan (taxminan 104 million dollar) oshgan. SolarSquare joriy yilda uy xoʻjaliklari uchun oʻrnatilgan quyosh panellari portfelini 200 MWgacha yetkazishni maqsad qilgan.
“Zamin”ni Telegramʻda oʻqing!
