Sber kompaniyasi oʻzining sunʼiy intellekt modeli boʻlgan GigaChat yangi yutuqqa erishganini maʼlum qildi. Neyrotarmoq Moskva energetika institutida (NIU MEI) "Elektroenergetika" va "Issiqlik energetikasi" yoʻnalishlari boʻyicha akademik attestatsiyadan muvaffaqiyatli oʻtib, "yaxshi" bahosini oldi. Bu Rossiyada ishlab chiqilgan va bir vaqtning oʻzida bir nechta muhandislik mutaxassisliklari boʻyicha imtihon topshirgan ilk til modelidir. Bu haqda Ixbt.com xabar beradi.
Imtihon jarayoni Sber mutaxassislari, NIU MEI olimlari va "Rosseti" kompaniyasi ekspertlari tomonidan tashkil etildi. Universitet katta til modellarini baholash uchun maxsus bençmark ishlab chiqdi. Jami 24 ta fan boʻyicha oʻtkazilgan sinovlarda GigaChat muhandislik hisob-kitoblari, meʼyoriy-huquqiy bazalar va energetika iqtisodiyoti sohalaridagi bilimlarini namoyish etdi.
Ushbu yutuq neyrotarmoqning kelajakda muhandislar, loyihachilar, talabalar va energetika korxonalari mutaxassislari uchun foydali vositaga aylanishini anglatadi. GigaChat avvalroq tibbiyot, musiqa nazariyasi, moliya va qurilish kabi 20 dan ortiq yoʻnalishlarda oʻz bilimini sinovdan oʻtkazgan. Shuningdek, model xalqaro moliyaviy tahlilchi sertifikatini olish uchun zarur boʻlgan oʻtish ballidan 10 foizga yuqori natija koʻrsatgan.
“Zamin”ni Telegramʻda oʻqing!
