Synology kompaniyasi sunʼiy intellekt imkoniyatlari bilan jihozlangan ikkita yangi kuzatuv kamerasini — BC510 va TC510 modellarini rasman taqdim etdi. Ushbu qurilmalar yuqori sifatli tasvir va ilg‘or tahliliy funksiyalarni o‘zida mujassam etgan bo‘lib, xavfsizlik tizimlarini yangi bosqichga olib chiqishga mo‘ljallangan. Bu haqda Ixbt.com xabar beradi.
Yangi kameralar IP66 va IP67 standartlari bo‘yicha chang hamda suvdan himoyalangan. Ular 2880 x 1620 pikselli tasvirni soniyasiga 30 kadr tezlikda yozib olish imkoniyatiga ega. Shuningdek, 110 darajali keng burchakli obyektiv va 30 metrgacha bo‘lgan masofada ishlaydigan tungi ko‘rish rejimi har qanday sharoitda aniq tasvirni taʼminlaydi.
Qurilmalar Edge AI texnologiyasi bilan jihozlangan bo‘lib, ular piyodalar va transport vositalarini hisoblash, shuningdek, hududga ruxsatsiz kirish holatlarini aniqlash kabi vazifalarni to‘g‘ridan-to‘g‘ri qurilmaning o‘zida qayta ishlaydi. Bu esa server yuklamasini kamaytirib, javob qaytarish tezligini oshiradi.
Synology ushbu kameralarni o‘zining mavjud kuzatuv tizimlari, maʼlumotlarni saqlash va bulutli xizmatlari bilan uzluksiz integratsiya qilishni maqsad qilgan. Shuningdek, standart tarmoq protokollari yordamida ushbu modellar uchinchi tomon dasturiy taʼminotlari bilan ham bemalol ishlay oladi.
“Zamin”ni Telegramʻda oʻqing!
