Google kompaniyasi Fitbit ilovasini Google Health deb qayta nomlaganini va sunʼiy intellekt yordamida ishlaydigan yangi sogʻliqni saqlash murabbiyi xizmatini taqdim etishini eʼlon qildi. Ushbu yangilik kompaniyaning 2021-yilda Fitbit’ni sotib olgandan keyingi fitnes strategiyasining asosiy qismiga aylanadi. Bu haqda Techcrunch.com xabar beradi.
Yangi Google Health Coach xizmati Gemini AI texnologiyasidan foydalangan holda foydalanuvchilarga shaxsiylashtirilgan tavsiyalar beradi. U fitnes murabbiyi, uyqu boʻyicha mutaxassis va salomatlik maslahatchisi vazifalarini bajaradi. Foydalanuvchilar oʻz maqsadlari, kundalik tartibi va jismoniy holati haqidagi maʼlumotlarni kiritish orqali moslashtirilgan dasturga ega boʻlishadi.
Xizmat 19-maydan boshlab Google Health Premium obunasi doirasida taqdim etiladi. Obuna narxi oyiga 9,99 dollar yoki yiliga 99 dollarni tashkil etadi, Google AI Pro va Ultra foydalanuvchilari esa ushbu xizmatdan qoʻshimcha toʻlovsiz foydalanishlari mumkin.
Google Health Coach dasturi mashgʻulotlar, ovqatlanish va uyqu sifatini tahlil qilish bilan birga, foydalanuvchi bilan tabiiy tilda muloqot qila oladi. Dastlabki bosqichda xizmat Fitbit va Pixel Watch foydalanuvchilari uchun mavjud boʻladi, keyinchalik esa boshqa qurilmalarda ham qoʻllab-quvvatlanishi rejalashtirilgan.
“Zamin”ni Telegramʻda oʻqing!
