Shvetsiyaning Pit startapi ijtimoiy tarmoqlardagi shov-shuvli postlari bilan eʼtiborni tortgan boʻlsa-da, bugungi kunda Stokgolmdagi eng istiqbolli sunʼiy intellekt loyihalaridan biriga aylanib ulgurdi. Kompaniya Voi skuterlar xizmati asoschilari, jumladan Fredrik Hjelm hamda iZettle va Klarna kompaniyalarining sobiq muhandislari tomonidan boshqariladi. Loyiha a16z venchur fondidan 16 million dollar miqdorida sarmoya jalb qildi. Bu haqda Techcrunch.com xabar beradi.
Pit kompaniyasi korporativ mijozlar uchun maxsus dasturiy taʼminot yaratish va biznes jarayonlarini avtomatlashtirishga ixtisoslashgan. Kompaniya bosh direktori Adam Jaferning soʻzlariga koʻra, zamonaviy sunʼiy intellekt modellari shunchaki matn yaratuvchi chatbotlar darajasidan oʻtib, amaliy vazifalarni bajara oladigan agentlarga aylangani loyihaning asosiy turtkisi boʻldi. Pit oʻzini oddiy dasturiy vosita emas, balki "xizmat koʻrsatuvchi sunʼiy intellekt jamoasi" sifatida namoyon etadi.
Startap ikki asosiy yoʻnalishda ishlaydi: Pit Studio va Pit Cloud. Pit Studio xodimlarga sunʼiy intellekt yordamida jarayonlarni boshqarish imkonini bersa, Pit Cloud korporativ standartlar, xavfsizlik va audit talablariga javob beradigan dasturiy muhitni taqdim etadi. Hozirda kompaniya telekommunikatsiya, sogʻliqni saqlash va logistika sohalaridagi mijozlar bilan ichki jarayonlarni avtomatlashtirish boʻyicha sinovlarni oʻtkazmoqda.
Adam Jaferning taʼkidlashicha, Pit ish oʻrinlarini qisqartirishni emas, balki xodimlarni zerikarli va takrorlanuvchi ofis ishlaridan ozod qilib, ularni biznes uchun koʻproq qiymat keltiradigan vazifalarga yoʻnaltirishni maqsad qilgan. Kompaniya oʻz mijozlariga natija kafolatlash uchun maxsus muhandislarni jalb qilmoqda va sunʼiy intellekt imkoniyatlaridan foydalangan holda ish unumdorligini oshirishga intilmoqda.
“Zamin”ni Telegramʻda oʻqing!
