Sharqiy Timor mamlakat tarixidagi eng yirik raqamli tashabbuslardan birini amalga oshirdi. Endilikda 450 ta chekka qishloq aholisi Starlink sunʼiy yoʻldosh aloqasi orqali yuqori tezlikdagi internetdan foydalanish imkoniyatiga ega boʻldi. Loyiha Transport va aloqa vazirligi hamda Davlat boshqaruvi vazirligining raqamli modernizatsiya dasturi doirasida hayotga tatbiq etildi. Bu haqda Ixbt.com xabar beradi.
Infratuzilmani oʻrnatishda Starlink kompaniyasining Sharqiy Timordagi rasmiy hamkori — Vorakai Lda muhim rol oʻynadi. Aynan ushbu kompaniya ilgari barqaror aloqa va telekommunikatsiya infratuzilmasi boʻlmagan hududlarni global tarmoqqa uladi. Hukumat vakillarining taʼkidlashicha, bu loyiha mamlakatdagi raqamli tengsizlikni bartaraf etish yoʻlidagi eng katta qadamdir.
Yangi tarmoq davlat xizmatlarini eng olis hududlarda ham raqamli formatga oʻtkazish imkonini bermoqda. Qishloq aholisi endilikda shaharlarga koʻp soatlik yoʻl bosib oʻtirmasdan, taʼlim, tibbiyot va maʼmuriy xizmatlardan masofadan turib foydalanishi mumkin. Vorakai Lda vakillarining soʻzlariga koʻra, mamlakat aholi turmush darajasini va iqtisodiy imkoniyatlarini tubdan oʻzgartiradigan «raqamli sakrash»ni amalga oshirmoqda.
Starlink hozirda 160 ga yaqin mamlakat va hududlarda 10 milliondan ortiq faol foydalanuvchiga xizmat koʻrsatmoqda. Kompaniya oʻz sunʼiy yoʻldoshlar tarmogʻini kengaytirishda davom etmoqda va 2025-yilda haftasiga oʻrtacha 70 dan ortiq sunʼiy yoʻldoshni orbitaga chiqardi. Shuningdek, SpaceX 2026-yilga borib kunlik uskunalar ishlab chiqarish hajmini 50 000 donaga yetkazishni rejalashtirmoqda.
“Zamin”ni Telegramʻda oʻqing!
