Anker kompaniyasi o‘zining yangi Air+ Ultra Slim Magnetic Power Bank (Nano) tashqi akkumulyatorini taqdim etdi. Qurilma 10 000 mA·soat sig‘imga ega bo‘lishiga qaramay, atigi 1,47 sm qalinlik va 210 gramm og‘irlikka ega. U iPhone smartfonlarining kamera blokini to‘sib qo‘ymaydi va korpusdan tashqariga chiqib ketmaydi. Bu haqda Ixbt.com xabar beradi.
Qurilma 17 ta kuchli magnit yordamida smartfonga mahkam o‘rnashadi. U 15 Vt quvvatda simsiz quvvatlash imkonini beradi, bu esa iPhone 17 Pro modelini 30 daqiqada 40 foizgacha quvvatlashga yetarli. Shuningdek, USB-C porti orqali 30 Vt tezlikda quvvat olish mumkin, bu usulda smartfon 22 daqiqada 50 foizgacha quvvatlanadi.
Akkumulyator ichida Apple bilan hamkorlik qiluvchi ATL kompaniyasining elementlari ishlatilgan. Qizib ketishning oldini olish uchun grafen materiallar va maxsus haroratni nazorat qiluvchi chip o‘rnatilgan. Foydalanuvchilar Anker ilovasi orqali batareya holati va haroratni real vaqt rejimida kuzatib borishlari mumkin.
Yangi model hozirda 399 yuan narxida oldindan buyurtma uchun ochiq. Qurilma 1 mm gacha bo‘lgan magnitli g‘iloflar bilan ham bemalol ishlaydi.
“Zamin”ni Telegramʻda oʻqing!
