Shvetsiyaning Truecaller kompaniyasi 2026-yilning ikkinchi choragida o‘z xodimlarining qariyb 15 foizini yoki 70 nafarini qisqartirishini e’lon qildi. Bu qaror kompaniyaning birinchi chorakdagi moliyaviy ko‘rsatkichlari pasayishi ortidan qabul qilindi. Bu haqda Techcrunch.com xabar beradi.
Kompaniya daromadlarining kamayishiga Hindistondagi real pul tikiladigan o‘yinlar sektoridagi cheklovlar, Google kabi hamkorlarning reklama algoritmlaridagi o‘zgarishlar hamda Yaqin Sharqdagi geosiyosiy vaziyat sabab bo‘lganini ma’lum qildi. Xususan, Hindistondagi sof daromad 41 foizga, reklama tushumlari esa 44 foizga qisqargan.
Shunga qaramay, Truecaller faol foydalanuvchilari soni 500 milliondan oshdi. Shuningdek, kompaniyaning obuna bo‘yicha daromadlari 27 foizga o‘sdi. AI Assistant va Family Protection kabi yangi funksiyalar pullik xizmatlar jozibadorligini oshirishga xizmat qilmoqda.
Kompaniya rahbari Rishit Jhunjhunwala o‘tgan yilgi yuqori ko‘rsatkichlar asosan Hindistondagi kriket mavsumi bilan bog‘liq reklama faolligi hisobiga erishilganini ta’kidladi. Joriy yilda kompaniya aksiyalari qiymati sezilarli darajada pasaygan bo‘lsa-da, hisobot e’lon qilinganidan so‘ng qisman tiklanish kuzatilmoqda.
“Zamin”ni Telegramʻda oʻqing!
