Cloudflare kompaniyasi oʻz tarixida ilk bor yirik qisqartirishlarni amalga oshirib, xodimlarining 20 foizini, yaʼni 1100 nafarga yaqin mutaxassisni ishdan boʻshatishini eʼlon qildi. Ushbu qaror kompaniyaning 2026-yil birinchi choragi boʻyicha moliyaviy hisoboti eʼlon qilingan vaqtga toʻgʻri keldi. Bu haqda Techcrunch.com xabar beradi.
Kompaniya rahbariyati ushbu qadamni xarajatlarni tejash emas, balki sunʼiy intellekt texnologiyalaridan samarali foydalanish strategiyasi bilan izohladi. Bosh direktor Matthew Prince taʼkidlashicha, sunʼiy intellekt vositalari xodimlarning unumdorligini 100 barobargacha oshirgan, bu esa kompaniya faoliyatini qayta koʻrib chiqishni taqozo etgan.
Qisqartirishlar savdo boʻlimidan tashqari barcha jamoalarni qamrab oldi. Qizigʻi shundaki, ushbu oʻzgarishlar Cloudflare tarixidagi eng yuqori daromad koʻrsatkichi — 639,8 million dollar qayd etilgan davrga toʻgʻri keldi, bu oʻtgan yilga nisbatan 34 foizga koʻpdir.
Kompaniya rahbariyati sunʼiy intellekt davrida yuqori oʻsish surʼatlariga ega boʻlgan korxona qanday ishlashi kerakligini belgilab olishni maqsad qilgan. Shunga qaramay, kompaniya hali ham barqaror foydaga chiqmagan va 62 million dollar miqdorida zarar koʻrgan.
“Zamin”ni Telegramʻda oʻqing!
