Internet-infratuzilma va kiberxavfsizlik sohasida faoliyat yurituvchi Amerika kompaniyasi Cloudflare oʻz biznes modelini sunʼiy intellektga moslashtirish jarayonida xodimlarining qariyb 20 foizini qisqartirishini eʼlon qildi. Dunyo boʻylab 1100 nafardan ortiq xodimni qamrab oladigan ushbu qaror kompaniyaning yangi davr talablariga moslashish strategiyasining bir qismidir. Bu haqda Ixbt.com xabar beradi.
Kompaniya rahbariyati ushbu qadamni xodimlarning samaradorligi bilan emas, balki murakkab ish jarayonlarini avtomatlashtirishga qodir boʻlgan sunʼiy intellekt agentlarini joriy etish bilan izohladi. Cloudflare ichki tizimlarida sunʼiy intellekt vositalaridan foydalanish soʻnggi uch oy ichida olti barobardan koʻproqqa oshgan, bu esa biznes tuzilmasini tubdan oʻzgartirib yubordi.
Moliyaviy hisobotlar eʼlon qilinganidan soʻng, kompaniya aksiyalari birja savdolarida 19 foizga arzonlashdi. Garchi birinchi chorak natijalari tahlilchilar kutganidan yuqori boʻlsa-da, ikkinchi chorak uchun prognoz qilingan daromad koʻrsatkichlari investorlarda biroz xavotir uygʻotdi.
Ushbu holat global texnologiya bozoridagi umumiy tendensiyani aks ettiradi. Block kabi yirik kompaniyalar ham sunʼiy intellektni integratsiya qilish maqsadida oʻz shtat birliklarini sezilarli darajada qisqartirmoqda. Goldman Sachs tahlilchilari sunʼiy intellekt taʼsirida mehnat bozorida jiddiy oʻzgarishlar yuz berayotganini va har oy minglab ish oʻrinlari qisqarayotganini taʼkidlamoqda.
“Zamin”ni Telegramʻda oʻqing!
