2021-yilda fazoga uchirilgan James Webb kosmik teleskopi Messier 77 spiral galaktikasining yangi va batafsil tasvirini taqdim etdi. Yerimizdan taxminan 45 million yorugʻlik yili masofasida, Kit yulduz turkumida joylashgan ushbu galaktika oʻzining oʻta yorqin va faol yadrosi bilan ajralib turadi. Bu haqda Ixbt.com xabar beradi.
Galaktika markazida massasi Quyoshnikidan 8 million barobar katta boʻlgan oʻta massiv qora tuynuk mavjud. Uning atrofidagi moddalar tortishish kuchi taʼsirida markazga intilib, qizigan akkretion diskni hosil qiladi. Aynan shu jarayon natijasida ajralib chiqayotgan kuchli infraqizil nurlanish teleskopning MIRI asbobi yordamida qayd etildi.
James Webb teleskopining yuqori sezgirligi galaktikalarni oʻrab turgan chang bulutlarini «teshib oʻtish» va yadro tuzilishini misli koʻrilmagan aniqlikda kuzatish imkonini beradi. Bu kabi tadqiqotlar olimlarga qora tuynuklarning oʻsish mexanizmlari hamda ularning galaktika evolyutsiyasiga taʼsirini chuqurroq tushunishga yordam beradi.
NASA ushbu teleskopni koinotning ilk davrlari, yulduzlar shakllanishi va qora tuynuklar tabiatini oʻrganishda asosiy vosita sifatida qoʻllamoqda. Messier 77 galaktikasining yangi suratlari zamonaviy infraqizil astronomiya imkoniyatlari qanchalik kengayganini yaqqol namoyish etadi.
“Zamin”ni Telegramʻda oʻqing!
