Star Labs kompaniyasi qimmatbaho StarFighter noutbukini taqdim etdi

Britaniyaning Star Labs kompaniyasi o‘zining yangi StarFighter noutbukini sotuvga chiqardi. Qurilmaning bazaviy konfiguratsiyasi qariyb 1900 dollarga baholangan bo‘lsa-da, u diskret grafik karta yoki eng so‘nggi avlod protsessorlari bilan jihozlanmagan. Bu haqda Ixbt.com xabar beradi.

Boshlang‘ich model 1880 dollar turadi va u Core Ultra 5 125H protsessori, 32 GB tezkor xotira hamda 1 TB hajmli SSD bilan ta’minlangan. Noutbuk 16 dyuymli QHD ekran, 165 Gts yangilanish tezligi, Wi-Fi 6E, Thunderbolt 4 va 80 Vt/soat sig‘imli batareyaga ega. Qurilmaning qalinligi 20 mm, vazni esa 1,6 kg ni tashkil etadi.

Qimmatroq versiyalarda Core Ultra 9 285HX yoki Ryzen 7 8845HS protsessorlari, 64 GB gacha tezkor xotira, 4 TB hajmli SSD va 120 Gts chastotali 4K ekranlar mavjud. Garchi narx yuqori bo‘lsa-da, noutbuk o‘ziga xos xususiyatlarga ega.

Qurilma MacBook kabi taktil qayta aloqaga ega sensorli panel, yechib olinadigan kamera va simsiz tarmoqlarni o‘chirish uchun jismoniy tugma bilan jihozlangan. Shuningdek, korpus keramik qoplama bilan qoplangan bo‘lib, tizim Coreboot, EDK II va Linux platformalarini qo‘llab-quvvatlaydi.

Nodirbek Razzokov

«ZAMIN.UZ» muharriri

+ Zamin.uz saytini Google'ga qo'shing