General Motors (GM) kompaniyasi Kaliforniya bosh prokurori Rob Bonta boshchiligidagi huquqni muhofaza qiluvchi organlar bilan maxfiylik boʻyicha kelishuvga erishdi. Kompaniya mijozlarning haydash odatlari toʻgʻrisidagi maʼlumotlarni ularning roziligisiz sugʻurta kompaniyalariga sotganlikda ayblangan edi. Bu haqda Techcrunch.com xabar beradi.
Tergov natijalariga koʻra, GM oʻzining OnStar dasturi orqali yuz minglab kaliforniyaliklarning ism-sharifi, geolokatsiya maʼlumotlari va avtomobil boshqarish uslubi haqidagi axborotlarni Verisk Analytics va LexisNexis Risk Solutions kabi maʼlumotlar brokerlariga sotgan. Ushbu noqonuniy savdodan kompaniya taxminan 20 million dollar daromad koʻrgan.
Kelishuv shartlariga koʻra, GM 12,75 million dollar miqdorida jarima toʻlaydi va kelgusi besh yil davomida haydovchilar haqidagi maʼlumotlarni isteʼmolchilarni baholash agentliklariga sotishni toʻxtatadi. Shuningdek, kompaniya oʻzida saqlanib qolgan barcha maʼlumotlarni 180 kun ichida oʻchirib tashlashi va hamkorlaridan ham shuni talab qilishi shart.
Rob Bonta kompaniyaning mijozlarni chalgʻitganini va ularning maxfiylik huquqlarini buzganini taʼkidladi. GM vakillari esa ushbu kelishuv 2024-yilda toʻxtatilgan Smart Driver mahsulotiga tegishli ekanligini va kompaniya oʻz maxfiylik siyosatini kuchaytirish boʻyicha choralar koʻrayotganini maʼlum qildi.
“Zamin”ni Telegramʻda oʻqing!
