Telegram asoschisi Pavel Durov Fransiya hukumatini ikkiyoqlama siyosat yuritishda aybladi. Uning so‘zlariga ko‘ra, rasmiy Parij o‘zi yo‘l qo‘yayotgan xatolarni yashirish maqsadida X ijtimoiy tarmog‘i va Ilon Maskka nisbatan bosim o‘tkazmoqda. Bu haqda Ixbt.com xabar beradi.
Durov Fransiya hukumatini vahimaga tushganlikda ayblab, 2027-yildagi siyosiy o‘zgarishlar ularning noqonuniy harakatlarini fosh etishidan xavotirda ekanligini ta’kidladi. Uning fikricha, hukumat so‘z erkinligini ta’minlovchi platformalarni har qanday bahona bilan cheklashga urinmoqda.
«Erkin dunyo Ilon Mask va X platformasi tomonida turishi kerak. Telegram o‘z erkinliklari uchun kurashayotgan X jamoasini qo‘llab-quvvatlaydi», — deya bayonot berdi Pavel Durov.
Fransiya prokuraturasi esa Ilon Maskni ijtimoiy tarmoq faoliyati bo‘yicha olib borilayotgan keng ko‘lamli tergov doirasida jinoyat ishlari bo‘yicha ko‘rsatma berish uchun chaqirgan. Bu holat AQSH va Yevropa o‘rtasida texnologik platformalarni nazorat qilish borasidagi qarashlar farqini yanada yaqqol namoyon etmoqda.
“Zamin”ni Telegramʻda oʻqing!
