iQOO 15T smartfoni: Dimensity 9500 Monster va 200 MP kamera bilan taqdim etiladi

iQOO 15T smartfoni Dimensity 9500 Monster chipi bilan jihozlangan ilk qurilma bo‘lishi kutilmoqda. Digital ChatStation insayderining ma’lumotlariga ko‘ra, ushbu protsessor standart Dimensity 9500 versiyasidan eksklyuziv optimizatsiyalar va kompaniyaning o‘z ishlanmasi bo‘lgan Q3 chipi bilan ajralib turadi. Bu haqda Ixbt.com xabar beradi.

Insayder qurilmani o‘yinlarda sinovdan o‘tkazib, uning samaradorligini «shunchaki hayratlanarli» deb baholadi. Xususan, Genshin Impact o‘yinidagi kadrlar chastotasi yengilroq MOBA-o‘yinlar darajasiga yetgan, bu esa yangi modelning o‘yinlar uchun yuqori darajada moslashganini ko‘rsatadi.

Smartfon 6,82 dyuymli 2K aniqligidagi tekis ekran bilan jihozlanishi kutilmoqda. Shuningdek, qurilmaning asosiy kamerasi 200 MP ruxsatga ega bo‘lishi haqida ma’lumotlar mavjud.

Eslatib o‘tamiz, Digital ChatStation avvalroq Xiaomi 15 va Xiaomi 15 Pro smartfonlarining texnik xususiyatlarini, shuningdek, Realme GT 7 Pro modelining Samsung ekraniga ega bo‘lishini aniq bashorat qilgan edi.

Nodirbek Razzokov

«ZAMIN.UZ» muharriri

+ Zamin.uz saytini Google'ga qo'shing