DDR5 operativ xotiralari orasida soxta modullar paydo bo‘ldi

Osiyo bozorida DDR5 operativ xotira modullarining narxi oshishi ortidan soxta mahsulotlar oqimi ko‘paydi. Internetdagi savdo maydonchalari va chakana do‘konlarda sotuvga chiqarilgan ushbu qurilmalar tashqi ko‘rinishidan haqiqiy xotira modullariga o‘xshasa-da, aslida hech qanday funksional xususiyatga ega emas. Bu haqda Ixbt.com xabar beradi.

X ijtimoiy tarmog‘i foydalanuvchisi Taki tomonidan e’lon qilingan ma’lumotlarga ko‘ra, 16 gigabaytli Samsung markali deb taqdim etilgan modullarda SK hynix chiplari o‘rnatilgani ko‘rsatilgan. Biroq, tekshiruvlar davomida ushbu «chiplar» aslida oddiy plastik bo‘laklar ekanligi aniqlandi. Firibgarlar plastik qismlarga maxsus markirovka tushirib, ularni haqiqiy xotira chiplari sifatida ko‘rsatishga urinishmoqda.

Hozirda bunday soxta mahsulotlar Yahoo Japan kabi platformalarda «kafolatsiz» va «qaytarib olinmaydigan» shartlar bilan sotilmoqda. Mutaxassislar xaridorlarni ehtiyotkor bo‘lishga va shubhali arzon narxdagi texnikalarni xarid qilmaslikka chaqirmoqda.

Kompyuter butlovchi qismlari taqchilligi va narxlarning yuqoriligi firibgarlar uchun qulay muhit yaratmoqda. Xaridorlar brend nomi va tashqi ko‘rinishga aldanib, ishlamaydigan plastik qismlarni sotib olish xavfi ostida qolmoqda.