Elon Musk o‘zining ijtimoiy tarmoqlaridagi sahifasida Starship kosmik kemasining imkoniyatlari haqidagi hisob-kitoblarni bo‘lishdi. Unga ko‘ra, kemaning foydali yuk hajmi 1000 kub metrdan oshadi, bu esa Xalqaro kosmik stansiyaning (XKS) umumiy hajmi bilan deyarli tengdir. Bu haqda Ixbt.com xabar beradi.
Taqqoslash uchun, XKSni qurish uchun 13 yil davomida 42 ta alohida parvoz va 150 milliard dollardan ortiq mablag‘ sarflangan. Starship esa birgina parvozda besh xonali uy hajmiga teng yukni, 100 dan ortiq sun’iy yo‘ldoshni yoki hatto Boeing 737 samolyotining qismlarini orbitaga olib chiqa oladi.
Kemaning balandligi 18 metrni tashkil etadi, bu esa besh qavatli uydan ham balandroq deganidir. SpaceX tizimning to‘liq qayta foydalanishga mo‘ljallanganligini ta’kidlamoqda, bu esa kelajakda teleskoplar, orbital stansiyalar va Marsga mo‘ljallangan modullarni yetkazib berish xarajatlarini keskin kamaytiradi.
Mutaxassislar Starship tizimini kosmik sanoatdagi «muhandislik mo‘jizasi» deb atashmoqda. Hozirda SpaceX yangi avlod Starship parvozi uchun tayyorgarlik ko‘rmoqda, avvalroq kompaniya Super Heavy raketasining 33 ta dvigatelini muvaffaqiyatli sinovdan o‘tkazgan edi.
“Zamin”ni Telegramʻda oʻqing!
