Xiaomi kompaniyasi minimalist dizaynga ega yangi Mijia dush tizimini namoyish qildi. Hozirda mahsulot kompaniyaning kraudfanding platformasida yigʻim bosqichida boʻlib, uning narxi ishtirokchilar uchun 900 yuan (135 dollar), chakana savdoda esa 1100 yuan (160 dollar) etib belgilangan. Bu haqda Ixbt.com xabar beradi.
Yangi qurilmaning asosiy xususiyati — 305 mm oʻlchamdagi katta dush boshi va shampun hamda boshqa aksessuarlar uchun moʻljallangan 370 mm kenglikdagi oʻrnatilgan tokcha hisoblanadi. Xiaomi nafaqat tashqi koʻrinishga, balki kundalik foydalanish qulayligiga ham katta eʼtibor qaratgan.
Tizim suv oqimini boshqarish uchun alohida tugmali panel bilan jihozlangan: har bir rejim uchun alohida tugma mavjud. Shuningdek, haroratni aniqroq sozlash imkonini beruvchi silliq mexanik rostlash tizimi qoʻllanilgan.
Old panel chiniqtirilgan shishadan ishlangan, ichki qismlar va korpus esa antibakterial guruch qotishmasidan tayyorlangan. Xiaomi taʼkidlashicha, bu yechim tizimning chidamliligini oshiradi va uni namlik hamda kirlardan himoya qiladi.
Dush tizimi suv berishning toʻrt xil rejimini qoʻllab-quvvatlaydi va bir vaqtning oʻzida bir nechta suv kanallaridan foydalanish imkonini beradi. Masalan, foydalanuvchilar yuqori dush va qoʻl dushini bir vaqtda yoqishi hamda tugmani bir marta bosish orqali rejimlarni tezda almashtirishi mumkin.
“Zamin”ni Telegramʻda oʻqing!
