Meta kompaniyasi WhatsApp'dagi Meta AI chatlarida "inkognito" rejimini ishga tushirayotganini eʼlon qildi. Ushbu yangi funksiya foydalanuvchilarga oʻzaro suhbatlarni xavfsiz muhitda olib borish imkonini beradi va hech kim, jumladan, kompaniyaning oʻzi ham bu yozishmalarni koʻra olmaydi. Bu haqda Techcrunch.com xabar beradi.
Foydalanuvchilar Meta AI bilan shaxsiy chatda maxsus belgi orqali ushbu rejimni faollashtirishlari mumkin. Mazkur funksiya nafaqat WhatsApp, balki alohida Meta AI ilovasida ham taqdim etiladi. Inkognito rejimida yozishmalar saqlanib qolmaydi va chat yopilishi bilan avtomatik tarzda oʻchib ketadi.
WhatsApp mahsulot boʻyicha vitse-prezidenti Alice Newton-Rex'ning taʼkidlashicha, odamlar sunʼiy intellektdan moliyaviy yoki sogʻliq bilan bogʻliq nozik masalalarda maslahat olish uchun foydalanmoqda. Shu bois, foydalanuvchilarga oʻz savollarini maksimal darajada maxfiy tarzda berish imkoniyatini taqdim etish kompaniya uchun ustuvor vazifadir.
Yangi rejim kompaniyaning oʻtgan oyda taqdim etilgan Muse Spark modeliga asoslangan. Shuningdek, Meta kelgusida "Side Chat" funksiyasini ham ishlab chiqmoqda, bu esa foydalanuvchilarga guruhli chatlarda boshqalarga koʻrinmaydigan tarzda sunʼiy intellekt bilan muloqot qilish imkonini beradi.
“Zamin”ni Telegramʻda oʻqing!
