Zararli dasturlarni tadqiq qiluvchi vx-underground guruhi o‘zining X ijtimoiy tarmog‘idagi sahifasida 30 terabayt hajmdagi zararli kodlar arxiviga egaligini ma’lum qildi. VirusTotal asoschisi Bernardo Kintero esa o‘z xizmatida foydalanuvchilar tomonidan taqdim etilgan 31 petabayt hajmdagi zararli dasturlar namunalari mavjudligini qayd etdi. Bir petabayt taxminan 1000 terabaytga teng ekanligini hisobga olsak, bu juda ulkan raqamlar hisoblanadi. Bu haqda Techcrunch.com xabar beradi.
Kiberxavfsizlik kompaniyalari va sun’iy intellekt tadqiqotchilari ushbu ma’lumotlar bazasidan tahdidlarni aniqlash modellarini o‘qitish hamda hujumlarning rivojlanishini tushunish uchun foydalanadilar. Mutaxassislar ushbu ma’lumotlarni 1 terabaytlik standart 3,5 dyuymli qattiq disklarga (HDD) joylashtirib, ularni ustma-ust taxlab chiqishsa, qanday balandlik hosil bo‘lishini hisoblab chiqishdi.
Hisob-kitoblarga ko‘ra, vx-underground bazasidagi 30 terabayt ma’lumot 30 ta qattiq diskni tashkil etadi va ularning balandligi taxminan 76 santimetrga yetadi. VirusTotal bazasidagi 31 petabayt ma’lumot esa 31 744 ta qattiq diskni talab qiladi. Agar ularni ustma-ust taxlab chiqilsa, minoraning balandligi qariyb 806 metrni tashkil etadi, bu esa dunyodagi eng baland inshootlar bilan raqobatlasha oladi.
“Zamin”ni Telegramʻda oʻqing!
