Texnologiya giganti Cisco kompaniyasi moliyaviy chorakdagi daromadlari kutilganidan yuqori boʻlishiga qaramay, oʻz xodimlarining taxminan 5 foizini yoki 4 mingga yaqin kishini ishdan boʻshatishini eʼlon qildi. Tarmoq uskunalari ishlab chiqaruvchisi ushbu qadamni xarajatlar tarkibini optimallashtirish hamda sunʼiy intellekt va kiberxavfsizlik sohalariga sarmoya kiritish zarurati bilan izohladi. Bu haqda Techcrunch.com xabar beradi.
Ciscoʼning bu qarori soʻnggi paytlarda texnologiya kompaniyalari orasida kuzatilayotgan tendensiyaga mos keladi. Avvalroq Cloudflare va General Motors kabi yirik kompaniyalar ham kuchli moliyaviy koʻrsatkichlarga qaramay, xodimlar sonini qisqartirgan edi. Cisco kiberxavfsizlikka investitsiyalarni oshirishni rejalashtirmoqda, chunki kompaniya router va fayervollaridagi zaifliklar tufayli yuzaga kelgan xavfsizlik muammolari bilan kurashmoqda.
Kompaniya bosh direktori Chak Robbins oʻz blogida Ciscoʼning rekord darajadagi daromadlari va ikki xonali oʻsish surʼatlari haqida faxr bilan yozdi. Shu bilan birga, u kompaniya ichida sunʼiy intellektdan foydalanish boʻyicha strategik investitsiyalar davom etishini taʼkidladi. Biroq, Robbinsning 2025-yil uchun 52 million dollardan ortiq kompensatsiya olishi rejalashtirilgani jamoatchilikda savollar uygʻotmoqda.
Cisco uchun bu soʻnggi yillardagi ilk qisqartirish emas. Kompaniya 2024-yilda ikki marta minglab xodimlarni ishdan boʻshatgan, 2025-yilda esa yana 150 ta ish oʻrni qisqartirilgan edi. Hozircha kompaniya vakillari bosh direktorning maoshi kamaytirilishi mumkinligi haqidagi savollarga javob bermadi.
“Zamin”ni Telegramʻda oʻqing!
