Verizon kompaniyasi Starlink va Amazon Leo sunʼiy yoʻldosh internet xizmatlari yaqin 10 yil ichida AQShda 5 milliongacha abonent toʻplashi mumkinligini taxmin qilmoqda. Biroq, New Street Research maʼlumotlariga koʻra, Starlink allaqachon jadal oʻsish surʼatlarini koʻrsatmoqda: 2025-yilda kompaniyaning global foydalanuvchilar bazasi ikki barobarga oshib, faqat AQShning oʻzida 2,7 million abonentga yetdi. Bu haqda Ixbt.com xabar beradi.
Shunga qaramay, Verizon rahbariyati vaziyatga xotirjam yondashmoqda. Kompaniya bosh direktori Dan Schulman sunʼiy yoʻldosh interneti yer usti tarmoqlariga toʻliq muqobil emas, balki qoʻshimcha xizmat boʻlishi mumkinligini taʼkidladi. Uning soʻzlariga koʻra, operatorlar daromadining asosiy qismi sunʼiy yoʻldosh texnologiyalari hali anʼanaviy infratuzilma bilan raqobatlasha olmaydigan shahar va shahar atrofi hududlaridan keladi.
Ayni paytda AT&T, T-Mobile va Verizon AQSh boʻylab, ayniqsa qishloq va kam taʼminlangan hududlarda aloqa sifatini yaxshilash maqsadida qoʻshma korxona tuzish boʻyicha kelishuvga erishdi. SpaceX esa Starlink tezligini sezilarli darajada oshiradigan yangi avlod stansiyalari ustida ishlamoqda.
Hozirgi kunda Starlink 160 dan ortiq mamlakatda 10 milliondan ortiq faol foydalanuvchiga xizmat koʻrsatmoqda. SpaceX yetkazib beruvchilari prognozlariga koʻra, sunʼiy yoʻldosh interneti foydalanuvchilari soni ikki yildan soʻng 100 milliondan, toʻrt yildan soʻng esa 200 milliondan oshishi kutilmoqda.
“Zamin”ni Telegramʻda oʻqing!
