Hozirgi kunda daromad topishning eng samarali yo‘li ma’lumotlar markazlarini qurish yoki ularni energiya bilan ta’minlovchi batareyalar ishlab chiqarishga o‘tishdek ko‘rinmoqda. Investorlar va fond bozorlari aynan shu yo‘nalishdagi kompaniyalarga katta qiziqish bildirmoqda. Masalan, Ford o‘zining energiya saqlash biznesini rivojlantirish orqali aksiyalar narxini keskin oshirib oldi, Redwood Materials esa Google va NVIDIA kabi gigantlardan sarmoya jalb qildi. Bu haqda Techcrunch.com xabar beradi.
Uzoq yillar davomida omon qolish uchun kurashgan GoPro kompaniyasi ham ushbu trenddan chetda qolmadi. Bir vaqtlar bozor yetakchisi bo‘lgan brend so‘nggi yillarda sotuvlar pasayishi va moliyaviy yo‘qotishlar tufayli qiyin ahvolga tushib qoldi. Kompaniya o‘zini qutqarish maqsadida mudofaa va aerokosmik bozorga kirish rejalarini e’lon qildi, bu esa qisqa muddatga bo‘lsa-da, aksiyalar narxining ikki barobar o‘sishiga sabab bo‘ldi.
Biroq, mudofaa sohasiga qilingan bu urinish kutilgan natijani bermadi va aksiyalar yana pasayib ketdi. Natijada, GoPro kompaniyasi Houlihan Lokey investitsiya bankini yollab, kompaniyani sotish yoki boshqa strategik muqobillarni ko‘rib chiqishga qaror qildi. Direktorlar kengashi mudofaa, iste’mol va moliya sektorlaridan qiziqish bildirgan tomonlardan takliflar kelib tushganini tasdiqladi.
Kompaniya ahvoli tobora og‘irlashmoqda: moliyaviy ko‘rsatkichlar yomonlashgani sababli GoPro o‘z xodimlarining chorak qismini ishdan bo‘shatishga majbur bo‘ldi. Hozirda kompaniyada atigi 600 ga yaqin ishchi qolgan, holbuki bir vaqtlar bu ko‘rsatkich 1500 nafarni tashkil etardi. 15 yil avval texnologiya olamining yulduzi bo‘lgan GoPro bugungi kunda o‘z o‘rnini saqlab qolish uchun kurashmoqda.
“Zamin”ni Telegramʻda oʻqing!
