OnePlus kompaniyasi foydalanuvchilardan kelib tushgan jiddiy shikoyatlar ortidan OxygenOS tizimining bir nechta yangilanishlarini vaqtincha to‘xtatib qo‘ydi. Gap 16.0.7.XXX va 16.0.5.XXX versiyalaridagi proshivkalar haqida bormoqda, ularni o‘rnatgan foydalanuvchilar smartfonlarning o‘z-o‘zidan qayta yuklanishi va tizim ishga tushishidagi nosozliklarga duch kelishgan. Bu haqda Ixbt.com xabar beradi.
Kompaniya rasmiy forumi orqali tarqatgan xabarida ushbu qaror qurilmalar barqarorligini saqlash va hali yangilanishni o‘rnatmagan foydalanuvchilarni muammolardan himoya qilish maqsadida qabul qilinganini ma’lum qildi. Hozircha qaysi smartfon modellari ushbu nosozlikdan ko‘proq zarar ko‘rgani va muammo qanchalik ommaviy tus olgani aniqlanmagan.
OnePlus vakillari xatoliklar bartaraf etilib, yangilanishlar qo‘shimcha sinovlardan o‘tkazilgandan so‘nggina tarqatish jarayoni qayta tiklanishini bildirdi. Biroq, tuzatilgan versiyaning qachon chiqishi haqida aniq muddat hozircha belgilanmagan.
Kompaniya yuzaga kelgan noqulayliklar uchun foydalanuvchilardan uzr so‘radi. Shuningdek, OnePlus kelgusida bunday holatlarning oldini olish uchun dasturiy ta’minotni sinovdan o‘tkazish va sifat nazorati bo‘yicha ichki tartib-qoidalarni qayta ko‘rib chiqayotganini ma’lum qildi.
“Zamin”ni Telegramʻda oʻqing!
