Elon Musk tomonidan OpenAI tuzilmasi, rahbariyati va moliyasiga tahdid solgan sud jarayoni magʻlubiyat bilan yakunlanganidan soʻng, sunʼiy intellekt giganti oʻzining birlamchi ommaviy taklifini (IPO) oʻtkazishga tayyorlanmoqda. Wall Street Journal manbalariga koʻra, kompaniya ushbu tarixiy qadamni tashlashga jiddiy kirishgan. Bu haqda Techcrunch.com xabar beradi.
OpenAI bosh ijrochi direktori Sam Altman kompaniya sentyabr oyigacha ommaviy savdolarga chiqishga tayyor boʻlishiga umid qilmoqda. ChatGPT yaratuvchisi ushbu jarayonda texnologik IPO sohasidagi yetakchi banklar — Goldman Sachs va Morgan Stanley bilan hamkorlik qilmoqda. Maʼlumotlarga koʻra, IPO uchun maxfiy hujjatlar bir necha kun yoki haftalar ichida tartibga soluvchi organlarga taqdim etilishi mumkin.
OpenAI kompaniyasining ushbu yirik moliyaviy harakati dunyo hamjamiyati SpaceX kompaniyasining IPO hujjatlari eʼlon qilinishini kutayotgan bir vaqtga toʻgʻri keldi. Elon Muskning xAI modelini oʻz ichiga olgan SpaceX hozirda OpenAI kompaniyasining asosiy raqobatchilaridan biri hisoblanadi.
Musk oʻzi asos solgan, biroq keyinchalik tark etgan kompaniyani sud orqali toʻxtatishga erisha olmagach, Musk va Altman oʻrtasidagi navbatdagi jang moliya bozorida davom etadigan koʻrinadi. Hozircha qaysi kompaniyaning IPO jarayoni muvaffaqiyatliroq boʻlishi katta qiziqish uygʻotmoqda. OpenAI hozircha ushbu xabarlar yuzasidan rasmiy izoh bermadi.
“Zamin”ni Telegramʻda oʻqing!
