AQSH Federal qidiruv byurosi (FBI) direktori lavozimiga nomzod Kash Patelga tegishli Based Apparel brendining rasmiy veb-sayti xakerlik hujumi haqidagi xabarlardan soʻng oflayn rejimga oʻtkazildi. Straight Arrow News nashrining xabar berishicha, sayt foydalanuvchilarga zararli dasturlarni yuqtirish maqsadida buzib kirilgan. Bu haqda Techcrunch.com xabar beradi.
Payshanba kuni X ijtimoiy tarmogʻidagi foydalanuvchilardan biri brend saytida infostealer (maʼlumot oʻgʻirlovchi) turidagi zararli dastur aniqlanganini maʼlum qildi. Ushbu turdagi dasturlar qurbonlarning shaxsiy maʼlumotlari, login va parollarini oʻgʻirlash uchun moʻljallangan. Keyinchalik kiberxavfsizlik boʻyicha tadqiqotchilar ushbu zararli kodni tahlil qilib, xavf mavjudligini tasdiqlashdi.
Hozirgi vaqtda Based Apparel sayti ishlamayapti va kompaniya vakillari vaziyat yuzasidan izoh berishmadi. TechCrunch nashri Patel bilan bogʻliq boʻlgan Gmail elektron pochta manzili orqali bogʻlanishga harakat qildi, biroq hozircha hech qanday javob olinmadi.
Ushbu hodisa MAGA harakati bilan bogʻliq biznes loyihalar uchun xavfsizlik nuqtayi nazaridan omadsiz haftaga toʻgʻri keldi. Juma kuni Donald Trump’ning mobil aloqa provayderi va Trump Mobile ishlab chiqaruvchisi mijozlarning shaxsiy maʼlumotlari, jumladan, ism-shariflari, elektron pochta manzillari va telefon raqamlari ochiq tarmoqda qolib ketganini tasdiqladi.
Maʼlumotlarning sizib chiqishi haqidagi xabar tadqiqotchilar Trump Mobile telefonlarini sotib olgan ikki nafar YouTuber’ni ogohlantirganidan bir necha kun oʻtib rasman tan olindi. Kiberxavfsizlik mutaxassislari foydalanuvchilarni shubhali saytlarga kirmaslik va shaxsiy maʼlumotlar himoyasiga eʼtiborli boʻlishga chaqirmoqda.
“Zamin”ni Telegramʻda oʻqing!
