SpaceX kompaniyasi Starship V3 oʻta ogʻir raketasining bugungi parvozi yuzasidan rasmiy bayonot berdi. Bu butun dastur doirasidagi oʻn ikkinchi sinov boʻlishiga qaramay, eng muhimlaridan biri hisoblanadi. Ilk bor V3 versiyasidagi kema va kuchaytirgich, yangi Raptor 3 dvigatellari hamda Texasdagi Starbase kosmodromining yangi Pad 2 maydonchasidan foydalanildi. Bu haqda Ixbt.com xabar beradi.
Start vaqtida Super Heavy kuchaytirgichining barcha 33 ta dvigateli muvaffaqiyatli ishga tushdi, biroq balandlikka koʻtarilish bosqichida ulardan biri oʻchib qoldi. Shunga qaramay, raketa pogʻonalarni ajratishni amalga oshirdi va Starship oltita dvigatel yordamida koinot sari parvozni davom ettirdi. Super Heavy kuchaytirgichi ortga qaytishga urindi, ammo dvigatellarni qayta ishga tushirishda muammolarga duch keldi.
Qaytish manevri uchun baʼzi dvigatellar ishlamay qolgani sababli, qoʻnish vaqtidagi tormozlanish urinishi muvaffaqiyatsiz tugadi va kuchaytirgich Meksika qoʻltigʻiga qattiq zarba bilan quladi. Starship yuqori pogʻonasi esa bitta vakuumli Raptor 3 dvigatelini yoʻqotganiga qaramay, rejalashtirilgan parvoz profiliga erishdi va dvigatel nosozligiga chidamliligini isbotladi.
Missiyaning asosiy vazifasi Starship’ning koinotdagi va qaytishdagi ishini tekshirish edi. Kema ilk bor 20 ta Starlink sunʼiy yoʻldoshi simulyatori va parvozni tasvirga oluvchi ikkita modifikatsiyalangan sunʼiy yoʻldoshni olib chiqdi. Atmosferaga kirishda issiqlik himoyasi va konstruksiya mustahkamligi haqida maʼlumotlar yigʻildi.
Parvozning yakuniy bosqichida Starship flaplarga tushadigan maksimal yuklamani tekshirish uchun ekstremal manevrlarni bajardi. Yakunda kema Hind okeaniga boshqariladigan tarzda qoʻndi va ikkita Raptor dvigateli yordamida qoʻnish manevrini yakunladi. Kuchaytirgich yoʻqotilganiga qaramay, sinov yangi avlod Starship loyihasi uchun muhim qadam deb baholanmoqda.
“Zamin”ni Telegramʻda oʻqing!
