Sunʻiy intellekt (AI) tarafdorlari uzoq vaqtdan beri ushbu texnologiya misli koʻrilmagan mahsuldorlik davrini boshlab berishini va undan foydalana oladigan xodimlarni boyitishini taʻkidlab kelishmoqda. ClickUp startapi bosh direktori Zeb Evansning fikricha, bu oʻzgarishlar allaqachon boshlangan. Oʻtgan payshanba kuni Evans X platformasida kompaniya xodimlarining 22 foizini ishdan boʻshatganini eʻlon qildi, biroq bu chorani xarajatlarni tejash emas, balki AI texnologiyalarini radikal tarzda joriy etish deb atadi. Bu haqda Techcrunch.com xabar beradi.
Evansning soʻzlariga koʻra, ushbu oʻzgarishdan tejalgan mablagʻlarning aksariyati kompaniyada qolgan xodimlarga yoʻnaltiriladi. ClickUp million dollarlik maosh stavkalarini joriy etishni rejalashtirmoqda. Agar xodim AI yordamida favqulodda yuqori natijaga erishsa, uning ish haqi anʻanaviy cheklovlardan tashqari, ancha yuqori miqdorda toʻlanadi. Bu esa kompaniyani "100x org" darajasiga olib chiqish strategiyasining bir qismidir.
Yaqinda ClickUp xodimlari oʻrniga murakkab vazifalarni bajarish uchun 3000 ga yaqin ichki AI agentlarini ishga tushirdi. Endilikda xodimlardan ishni oʻzlari bajarish emas, balki ushbu agentlarni boshqarish va yakuniy natijaning sifatini nazorat qilish talab etiladi. ClickUp bu borada yolgʻiz emas: Gartner soʻroviga koʻra, avtonom texnologiyalardan foydalanadigan kompaniyalarning qariyb 80 foizi ish oʻrinlarini qisqartirgan.
Biroq, tadqiqotlar shuni koʻrsatmoqdaki, ishchi kuchini qisqartirish har doim ham sezilarli moliyaviy foyda keltirmaydi. Baʻzi kompaniyalar AIdan shunchaki shtatlarni qisqartirish uchun bahona sifatida foydalanayotgan boʻlsa-da, ClickUp oʻzida mahsuldorlik oshganini daʻvo qilmoqda. Evansning taʻkidlashicha, kompaniya nafaqat ichki samaradorlikni oʻlchamoqda, balki ushbu yechimlarni mijozlar uchun yangi mahsulot sifatida taqdim etishga tayyorlanmoqda.
“Zamin”ni Telegramʻda oʻqing!
