Payshanba kuni Meta kompaniyasiga sotilgan Oculus asoschilari tomonidan tashkil etilgan Sesame startapi oʻzining yangi iOS ilovasini ommaga taqdim etdi. Bir yildan ortiq vaqt davomida ishlab chiqilgan ushbu loyiha ChatGPT kabi anʼanaviy chatbotlardan farqli ravishda, foydalanuvchi bilan tabiiy muloqot qila oladigan sunʼiy intellekt agentlarini taklif etadi. Tizimning oʻziga xosligi shundaki, u maʼlumotni qidirish va javob berish jarayonini inson nutqiga yaqinlashtirgan. Bu haqda Techcrunch.com xabar beradi.
Sesame texnologiyasi bir vaqtning oʻzida bir nechta parallel qidiruvlarni amalga oshirish imkonini beradi. Bu esa sunʼiy intellektga gapirayotgan vaqtida yangi maʼlumotlarni nutqqa qoʻshish yoki fikrini oʻrtada oʻzgartirish imkonini beradi. Ilovada toʻrtta turli xil agent — Maya, Miles, Simone va Charlie mavjud boʻlib, ularning har biri oʻz ovozi, xarakteri va xotirasiga ega. Avvalroq oʻtkazilgan tadqiqot bosqichida ushbu agentlardan bir necha hafta ichida milliondan ortiq kishi foydalangan edi.
Ilovada foydalanuvchilar uchun qulay boʻlgan bir qator funksiyalar, jumladan, vizual maʼlumotlar uchun qidiruv kartalari, eslatmalar yozish rejimi va maxfiy suhbatlar uchun "inkognito" rejimi joriy etilgan. Shuningdek, ovoz chiqarib gapirish imkoni boʻlmagan holatlar uchun matnli rejim ham mavjud. Kompaniya investorlari orasida mashhur Sequoia jamgʻarmasi bor boʻlib, startap yaqinda 250 million dollar miqdorida investitsiya jalb qilgan.
Sesame jamoasining rejalari faqat mobil ilova bilan cheklanib qolmaydi. Kompaniya 2027-yilda aqlli koʻzoynaklarni chiqarishni maqsad qilgan. Kelajakda ushbu agentlar nafaqat savollarga javob berishi, balki foydalanuvchi nomidan muayyan harakatlarni ham bajarishi kutilmoqda. Hozirda iOS ilovasi 39 ta davlatda bepul foydalanish uchun ochiq, biroq roʻyxatdan oʻtishda navbat kutish talab etilishi mumkin. Android foydalanuvchilari uchun esa ilova keyinroq taqdim etiladi.
“Zamin”ni Telegramʻda oʻqing!
