Elon Musk boshqaruvidagi X platformasi uzoq matnli maqolalar yozish imkoniyatini faqat pullik obunachilar va biznes hisoblar uchun taqdim etgan bir paytda, markazlashmagan Bluesky ijtimoiy tarmogʻi boshqacha yoʻldan bormoqda. Payshanba kuni Bluesky ilovasining yangi talqini taqdim etildi. U Standard.site loyihasi bilan integratsiya qilingan boʻlib, foydalanuvchilarga AT Protocol asosida uzun maqolalar va blogpostlarni oʻqish imkonini beradi. Bu haqda Techcrunch.com xabar beradi.
Endilikda Bluesky foydalanuvchilari faqat qisqa postlar bilan cheklanib qolmasdan, "Atmosphere" deb ataluvchi keng tarmoqdagi axborotnomalar va maqolalarni ham kuzatishlari mumkin. Bu tizimga Leaflet, pckt va Offprint kabi mustaqil mualliflar uchun moʻljallangan saytlar kiradi. Dastlabki bosqichda ushbu maqolalar dinamik havola kartochkalari koʻrinishida namoyon boʻladi, biroq Bluesky kelajakda bu funksionallikni yanada kengaytirishni vaʼda qilmoqda.
Ushbu yangilik Bluesky platformasining ochiq ekotizim yaratish strategiyasining bir qismidir. Fevral oyida Germ startapi bilan integratsiya orqali shaxsiy xabarlar xizmati yoʻlga qoʻyilgan edi. Endilikda 44,5 milliondan ortiq roʻyxatdan oʻtgan foydalanuvchiga ega boʻlgan Bluesky uchinchi tomon ilovalari uchun ulkan auditoriyani taqdim etmoqda. Bu esa AT Protocol asosida ishlovchi dasturchilar uchun katta imkoniyatdir.
Yaqinda WordPress ham oʻzining maxsus plagini orqali har qanday saytga Bluesky tarmogʻida maqola chop etish imkonini bergan edi. Bu shuni anglatadiki, sizning blogingiz shunchaki havola emas, balki AT Protocol ichidagi ochiq maʼlumotga aylanadi. X platformasidan farqli oʻlaroq, Bluesky maʼlumotlarning erkin koʻchib yurishi va foydalanuvchilarning turli serverlar (PDS) orasida oson almashishini qoʻllab-quvvatlaydi.
“Zamin”ni Telegramʻda oʻqing!
