Meta kompaniyasi kelasi yili sinovdan oʻtkazishni rejalashtirayotgan sunʻiy intellekt (AI) bilan ishlaydigan maxsus tumor (pendant) qurilmasi ustida ishlamoqda. The Information nashri tomonidan koʻrib chiqilgan hisobotga koʻra, ushbu gadjet foydalanuvchilarning kundalik muloqotlarini yozib olish va tahlil qilish imkoniyatiga ega boʻladi. Bu haqda Techcrunch.com xabar beradi.
Mazkur loyiha Meta tomonidan 2025-yil oxirida sotib olingan Limitless startapining ishlanmalariga asoslanishi kutilmoqda. Limitless kompaniyasi kiyimga taqib yuriladigan yoki boʻyinga osiladigan, suhbatlarni yozib oluvchi AI-tumorlarni yaratish bilan shugʻullangan. Meta vakillari ushbu xarid kompaniyaga "sunʻiy intellekt bilan jihozlangan taqiladigan qurilmalarni yaratish ishlarini jadallashtirish" imkonini berishini taʻkidlagan edi.
Avvalroq bozorga chiqarilgan boshqa AI-gadjetlar isteʻmolchilar orasida ommalashmadi. Bunga maxfiylik bilan bogʻliq xavotirlar, notoʻgʻri marketing strategiyalari yoki qurilmalarning yetarlicha foydali emasligi sabab boʻlgan boʻlishi mumkin. Shunga qaramay, OpenAI kabi yirik texnologik gigantlar bu yoʻnalishdan voz kechish niyatida emas.
Hisobotda keltirilishicha, Meta shuningdek, oʻzining aqlli koʻzoynaklar qatorini kengaytirishni va "Wearables for Work" deb nomlangan biznes-obunani ishga tushirishni rejalashtirmoqda. Yangi qurilmalar yordamida kompaniya joriy yilning birinchi choragida 4 milliard dollar zarar koʻrgan Reality Labs boʻlinmasining moliyaviy holatini yaxshilashga umid qilmoqda.
“Zamin”ni Telegramʻda oʻqing!
