Walmart oxir-oqibat Apple Pay va Google Payʼni qabul qila boshlaydi

Dunyoning eng yirik chakana savdo tarmoqlaridan biri boʻlgan Walmart koʻp yillik qarshilikdan soʻng oʻz doʻkonlarida Apple Pay va Google Pay toʻlov tizimlarini joriy etishini rasman eʼlon qildi. ixbt.com maʼlumotiga koʻra, ushbu oʻzgarish xaridorlarga qulaylik yaratish yoʻlidagi muhim qadam boʻlib, kompaniya oʻz pozitsiyasini oʻzgartirishga majbur boʻlganini koʻrsatadi. Bu haqda Techcrunch.com xabar beradi.

Kompaniya bayonotiga koʻra, joriy yilning 24-avgustidan boshlab tanlangan Walmart va Sam’s Club doʻkonlarida "Tap to Pay" orqali kontaktsiz toʻlovlarni qabul qilish bosqichma-bosqich yoʻlga qoʻyiladi. Yangi xizmat 2024-yil yakuniga qadar mamlakatdagi barcha savdo nuqtalarini qamrab olishi kutilmoqda.

Shundan soʻng, ushbu qulaylik 2027-yilning oʻrtalariga qadar kompaniyaga qarashli barcha yoqilgʻi quyish stansiyalarida ham ishga tushirilishi rejalashtirilgan. Bu esa millionlab xaridorlar uchun yillar davomida mavjud boʻlmagan muhim imkoniyatni ochib beradi.

Mustaqil toʻlov tizimlari tarixi

Mazkur qaror savdo olamida katta kutilmagan yangilik boʻldi, chunki Walmart ommalashgan raqamli hamyonlarni rad etib, oʻzining Walmart Pay va Scan-and-Go kabi ichki yechimlarini ilgari surishga urinib kelgan edi. Hatto oʻtmishda boshqa yirik riteylerlar bilan birgalikda Apple Payʼga qarshi CurrentC deb nomlangan muqobil toʻlov tizimini yaratishga ham harakat qilingan.

Biroq, bu urinish muvaffaqiyatsizlikka uchrab, 2016-yilning oʻzidayoq yopib yuborilgan edi. Shunga qaramay, Walmart rahbariyati oʻzining ichki tizimlarini afzal koʻrishda davom etdi, xaridorlar esa AQShdagi boshqa yirik savdo tarmoqlarida allaqachon odatiy holga aylangan zamonaviy kontaktsiz toʻlov usullarini talab qilishdan toʻxtamadi.

Bozor talablari va xaridorlar tanlovi

Bugungi kunda Apple Pay va shunga oʻxshash texnologiyalar Qoʻshma Shtatlardagi chakana savdo nuqtalarining 85 foizida, shu jumladan aksariyat yirik doʻkonlarda muvaffaqiyatli ishlatilmoqda. Walmartʼning bu qadami oʻziga xos magʻlubiyat sifatida baholanmoqda, chunki kompaniya oxir-oqibat oʻz xaridorlarini noqulay ahvoldaga solib qoʻyayotganini tan olishga majbur boʻldi.

Kompaniya vakillari ushbu yangilikni isteʼmolchilarga koʻproq erkinlik berish yoʻlidagi saʼy-harakat sifatida taqdim etishga harakat qilmoqda. “Tap to Pay naqd pul, kredit karta yoki Walmart Pay kabi boshqa toʻlov turlariga ajoyib qoʻshimcha boʻlib, xaridorlarga toʻlov vaqtida kengroq tanlov taqdim etadi”, deyiladi kompaniya bayonotida.