Citroеn янги авлод C5 Aircross кроссоверини расман тақдим қилди

Франциянинг машҳур автомобилсозлик компанияси Citroеn янги, иккинчи авлод C5 Aircross кроссоверини кенг жамоатчиликка таништирди. Янги модел брендингинг замонавий услубидаги дизайни, янги тор олд чироқлар ҳамда замонавий орқа фаралар билан ажралиб туради. Бу дизайнни аввалроқ компаниянинг C4 (2024) моделида ҳам кўриш мумкин эди.

Янгиланган салонда ортиқча элементларга ўрин қолдирилмаган бўлиб, барчаси оддий, қулай ва энг муҳими, замонавий технологиялар билан бойитилган. Интерьернинг асосий қисми бўлган катта вертикал экран билан жиҳозланган марказий консол диққатни жалб этади. Citroеn вакилларининг маълум қилишича, ушбу экран ҳозирча Stellantis автоконцернига тегишли барча автомобиллар орасида энг каттаси ҳисобланади.

Бундан ташқари, салондаги 10 дюймли рақамли асбоблар панели, атрофни ёритувчи амбиент ёритгичлари, симсиз зарядлаш тизими ҳамда панорама люки каби қулайликлар ҳам мавжуд. Янгиланган C5 Aircross яна бир муҳим жиҳатга эга – унинг ахборот-кўнгилочар тизимида сунъий интеллект асосидаги ChatGPT хизматидан фойдаланиш имконияти мавжуд.

Иккинчи авлод C5 Aircross Stellantis концернининг янги STLA Medium платформасида яратилган. У сотувга икки хил версияда чиқади – тўлиқ электрли ва гибрид вариантларда.

Электрли модификациясининг асосий варианти 210 от кучига эга бўлиб, тўлиқ қувватда бир марта қувватланган ҳолда 520 км йўл босиб ўта олади. Бундан ташқари, янада кучлироқ, яъни 230 от кучига эга бўлган, бир марта қувватланишда 680 км йўл босиш имконини берадиган қувватлироқ модификацияси ҳам сотувга чиқарилади.

Гибрид моделларда 1,2 литр ҳажмга эга бензинли ички ёнув двигатели ва электр мотор ўрнатилади, уларнинг умумий қуввати 148 от кучини ташкил қилади. Шунингдек, 1,6 литрли двигател билан таъминланган ва умумий қуввати 195 от кучига эга яна бир модификация ҳам сотувга чиқади. Гибрид моделларнинг фақат электр моторидан фойдаланган ҳолда босиб ўта оладиган масофаси 85 километрни ташкил қилади.

Янгиланган Citroеn C5 Aircross Европа бозорида 2025 йилнинг иккинчи ярмидан сотувга чиқарилади. Унинг нархлари ҳозирча расман эълон қилинганича йўқ. Автомобилсозлик жамоатчилиги ушбу модель харидорлар томонидан катта қизиқиш билан кутилаётганини таъкидламоқда. «Замин»ни Telegram’да ўқинг!