Haval Россияда янги F7x кроссоверини сотувга чиқаради: нархлари, жиҳозлари ва инновацион функциялари

Haval компанияси Россия бозори учун янги авлод F7x кроссоверининг нархлари ва жиҳозлари ҳақидаги маълумотларни эълон қилди. Машҳур модел 2025 йилнинг иккинчи чорагидан бошлаб сотувга чиқади ва икки хил жиҳозланиш даражасида харидорларга тақдим этилади.

Янги Haval F7x кроссоверининг Premium версияси 3 499 000 рубл, янада илғор имкониятларга эга бўлган Tech Plus версияси эса 3 699 000 рублдан сотилади.

Ҳар икки версия ҳам компаниянинг инновацион L.E.M.O.N. технологик платформаси асосида қурилган бўлиб, ҳайдовчига автомобилни тўлиқ назорат қилиш имконини тақдим этади. Янги модель қуввати 192 от кучига эга бўлган, 2,0 литрли бензинли турбо двигател ҳамда 7 поғонали икки муфтали роботлаштирилган узатмалар қутиси билан жиҳозланган.

Автомобилнинг тўлиқ ғилдиракли тизими замонавий электро-гидравлик муфта орқали ишлайди ва йўл шароитларига қараб танлаш мумкин бўлган олтита режимни ўз ичига олади. Уларнинг ичида “қор”, “қум”, “йўлдан ташқари” каби махсус режимлар мавжуд. Бундан ташқари, олд томонда McPherson ҳамда орқа томонда кўп линияли осма тизими юқори даражадаги қулайлик ва бошқарувчанликни таъминлайди.

Ички жиҳозлар ҳам юқори технологияларнинг сўнгги ютуқлари билан бойитилган. Салонда 12,3 дюймли рақамли приборлар панели ва 14,6 дюймлик сенсорли мультимедиа дисплей ўрнатилган. Мультимедиа тизимида смартфонлар билан симсиз уланиш имконияти, шунингдек, Россияда машҳур бўлган «Яндекс Авто» платформаси билан интеграция мавжуд.

Бундан ташқари, Haval Connection тизими орқали автомобилни мобил илова ёрдамида масофадан бошқариш мумкин. Бу илова двигателни масофадан туриб ишга тушириш, эшикларни қулфлаш ва очиш, иситиш тизимларини ёқиш, иқлим назорати ҳамда автомобиль геолокациясини кузатиш каби қулай функцияларни тақдим этади.

Харидорларга кузов учун тўртта ранг таклиф этилади: "Галактик қора", "Океаник лазурит", "Олижаноб агат" ва "Тутунли марварид". Салон эса фақат битта – қора рангда бўлади.

Янги Haval F7x кроссоверлари Россиянинг 96 та шаҳрида жойлашган 158 та Haval City дилерлик марказлари орқали сотилади. Мазкур автомобил тўлиқ цикл асосида Тула вилоятидаги заводда ишлаб чиқарилади. «Замин»ни Telegram’да ўқинг!