Enyaq RS — Skoda'нинг энг кучли кроссовери

Чехиянинг Skoda компанияси Enyaq моделини янада кучли версиясида — Enyaq RS сифатида тақдим этди, деб Daily-Motor.ru хабар берди. Янги электрокроссовер Skoda Elroq RS моделидаги электр тизимини мерос қилиб олган ва унинг кучли ҳаракатлантириш тизими билан ажралиб туради.

Enyaq RS икки электромотор ва тўлиқ тортув тизимига эга. Машина 340 от кучига эга бўлиб, 0 дан 100 км/соатга бор-йўғи 5,4 сонияда чиқади. Бу натижа Elroq RS моделига қараганда ҳам тезроқ.

Максимал тезлиги 180 км/соат бўлган ушбу кроссовер 79 кВт/соат аккумулятор билан жиҳозланган бўлиб, 550 кмгача зарядлашсиз ҳаракатлана олади. 10 фоиздан 80 фоизгача батареяни тўлдириш учун 26 дақиқа кифоя қилади (185 кВт тез зарядда).

Модел прогрессив бошқарув тизими, яхшиланган амортизаторлар ва пастлаштирилган суспенсия билан келади — олдин 15 мм, орқада 10 мм га пастлаштирилган.

Ихтиёрий равишда DCC шассисини бошқариш тизими ҳамда икки поршенли кучли тормоз суппортлари таклиф этилади.

Салонда карбон кўринишидаги декор, спорт услубидаги қизитилувчи рул ва массаж функциясига эга қўллаб-қувватловчи ўриндиқлар мавжуд.

Янги Enyaq RS яқин кунларда сотувга чиқади. Нархи ҳали эълон қилинмаган, лекин Skoda линейкасининг энг қиммат модели бўлиши кутилмоқда.
«Замин»ни Telegram’да ўқинг!