Malibu XL шартномалари бир соатда тугади — ажабланарли ҳолат!

29 май куни мамлакатдаги энг йирик автоконцернлардан бири — UzAuto Motors яна бир бор шов-шувли хабар билан чиқди. Компаниия Chevrolet Malibu XL модели учун контрактация жараёнини соат 14:40 да қайта очганини маълум қилди. Янги имконият ҳақидаги эълон чиқиши биланоқ, интернет орқали юзлаб харидорлар навбатга турди ва автомобил учун шартнома тузишга уринди.

Расмий маълумотларга кўра, бу галги контрактацияда ҳар бир мижоз ўз хоҳишига кўра Malibu XL’ни истаган рангда ва модификацияда танлаш имкониятига эга эди. Бу эса аввалги тажрибага нисбатан катта ютуқ сифатида баҳоланди. Аммо мижозларнинг қувончи узоққа чўзилмади.

Чунки эълондан атиги 42 дақиқа ўтиб, яъни соат 15:22 да UzAuto Motors барча шартномалар якунланганини маълум қилди. Мазкур янгилик кўплаб фойдаланувчиларда ҳайрат ва ҳатто норозилик уйғотди. Чунки компания шартнома сонини расман очиқламади — айнан қанча миқдорда автомобил тақдим этилгани номаълум бўлиб қолди.

Айтиш жоизки, UzAuto апрель ойи бошларида Malibu моделининг сотувини тўхтатганди. Бу вақтинчалик танаффус ортидан қайта ишга туширилган контрактация жараёни мижозлар томонидан жуда катта қизиқиш билан кутилаётган эди.

Эслатиб ўтамиз, Malibu XL’нинг “янгиланган” талқини илк марта 2023 йил март ойида бозорга чиқарилганди. Ўшанда компания ушбу моделни 3 турли комплектацияда (XL 1LT – 375 млн сўм, XL 2LT – 390 млн сўм ва XL LTZ – 419 млн сўм) таклиф қилишини айтган. Бироқ амалиётда асосан энг қиммат — XL LTZ комплектацияси сотувда бўлган.

Бундан ташқари, жорий йил апрел ойида ижтимоий тармоқларда тарқалган видеоларда автовозларга юкланган Malibu-2 автомобиллари акс этганди. Бу ҳолат жамоатчилик орасида янги Malibu моделлари ҳақида қизғин муҳокамаларни келтириб чиқарган эди. Шу муносабат билан UzAuto Motors мазкур автомобиллар Хитойдан келтирилаётганини тасдиқлаганди.

Шу тариқа, Malibu XL’га бўлган талаб яна бир бор унинг маҳаллий бозордаги юқори нуфузини кўрсатди. Бироқ шартномаларнинг шундай тез якунланиши ва маълумотлар очиқлигининг етишмаслиги оддий харидорлар учун яна саволлар туғдириши мумкин.

Фото: UzAuto Motors