Фото: Daily sabah
Дюсселдорфнинг жануби-ғарбидаги Лютцерат қишлоғида ҳудуддан қўнғир кўмир қазиб олиш учун фойдаланишга қарши чиққан полиция ва атроф-муҳит фаоллари ўртасида тўқнашувлар юз берди.
Дюсселдорфдан (Шимолий Рейн-Вестфалия) 40 километр жануби-ғарбда жойлашган Лютцерат қишлоғи аҳолисини якуний кўчириш арафасида Германиядаги энг йирик қўнғир кўмир конларидан бири - Гарцвайлер карьерининг ўзлаштирилиши муносабати билан полиция ва атроф-муҳит фаоллари ўртасида тўқнашувлар бўлиб ўтди. 2 январь, душанба куни ҳуқуқ-тартибот идоралари вакили жамоат тартибини бузиш моддаси бўйича жиноят иши қўзғатилганини маълум қилди.
Бунгача «Lützerath lebt» («Лютцерат тирик») ташаббуси фаоллари йўлларни тўсиб, бўм-бўш уйларда баррикада ўрнатган, шунингдек, тўсиқларга ўт қўйган.
Полициянинг таъкидлашича, гап ҳали январь ойи ўрталарига режалаштирилган ва фаолларни чиқариб юборишни назарда тутувчи тўлиқ кўчириш бошланиши ҳақида эмас, балки унга тайёргарлик ҳақида борган.
«Alle Dörfer Bleiben» («Барча қишлоқлар қолади») ташаббуси вакили Антье Буссберг: «Лютцерат яқинида кўмир қазиб олинмаслиги керак» деди.
RWE энергетика компанияси, ўз навбатида, шундай баёнот берди: «Бу қишда собиқ аҳоли пунктидан фойдаланиш (ҳудуддан) энергия инқирози шароитида электр станцияларини ишончли таъминлашни кафолатлаш учун зарур». «Лютцератда яшаганларнинг барчаси қишлоқни тарк этишди», дея қўшимча қилди компания.
Аҳоли пункти ҳудуди, шунингдек, Рейнланд-Пфальцнинг ушбу ҳудудидаги уйлар Гарцвайлер компаниясини бошқарадиган RWE корпорацияси назорати остига ўтди.
Хайнсберг округи аҳолининг ҳудудга киришини тақиқловчи фармон чиқарди. Агар буйруқ бажарилмаса, бу «10 январдан бошлаб чиқариб юбориш чораларини кўриш учун» асос бўлиб хизмат қилади, дейилади округ баёнотида.
Шимолий Рейн-Вестфалия ва умуман Германияда кўмирни босқичма-босқич тўхтатиш бўйича баҳс-мунозаралар фонида Лютцерат ва унинг атрофидаги бошқа кичик ҳудудларнинг тақдири узоқ вақтдан бери сиёсатчилар ва иқлим фаоллари ўртасидаги кескин можаролар марказида бўлиб келган. Сўнгги пайтларда Россиянинг Украинага қарши тажовузкор уруши билан боғлиқ энергетик инқироз туфайли келишмовчиликлар кучайган.
Шимолий Рейн-Вестфалиядаги охирги RWE қўнғир кўмир ёқилғиси электр станциялари 2030 йил 31 мартда ёпилади. Германия ҳукумати томонидан ишлаб чиқилган тегишли қонун 2022 йил 2 декабрга ўтар кечаси Бундестаг томонидан қабул қилинган. Уни 525 депутат қўллаб-қувватлади, 92 нафари қарши чиқди, яна икки депутат бетараф қолди.
Шу билан бирга, 2022 йил охирида ёпилиши керак бўлган Neurath электр станциясининг D ва E иккита қўнғир ёқилғи блокининг ишлаш муддати 2024 йил март ойи охиригача узайтирилди.
Федерал миқёсда қўнғир кўмир қазиб олиш дастлаб режалаштирилганидек, 2038 йилгача давом этиши керак. Бу, хусусан, Германиянинг шарқий қисмидаги қўнғир кўмирдан ишлайдиган электр станцияларига тегишли.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
