Туркия президенти: Сурияда ИШИД етакчиси йўқ қилинди

Туркия разведкаси Сурияда ИШИД террорчилик гуруҳи етакчиси Абу ал-Ҳусайн ал-Қурайшийни йўқ қилди. Бу ҳақда 30 апрел, якшанба куни Туркия президенти Ражаб Тоййиб Эрдўған TRK Turk телеканали эфирида айтиб ўтди.

Шунингдек, у ўзининг Twitter микроблогида ИШИД етакчисининг йўқ қилиниши ҳақида ёзган. У ерда Эрдўған операция 29 апрел куни бўлиб ўтганига аниқлик киритди, бироқ ўлдирилган жангари номини айтмади.

Айни вақтда, Reuters агентлиги Сурия разведка идораларига таяниб хабар беришича, рейд Сурия шимоли-ғарбидаги Жандарис шаҳрида амалга оширилган.

ИШИДнинг собиқ раҳбари Абу ал-Ҳасан ал-Ҳошимий ал-Қурайший эди. АҚШ Мудофаа вазирлиги 2022 йил 30 ноябрда у ўлдирилгани ҳақида эълон қилди. Ўшанда Пентагон хабарида айтилишича, жангари Туркия томонидан қўллаб-қувватланган Озод Сурия армияси (ОСА) томонидан мамлакат жанубида уюштирилган амалиётда ўлдирилган.

Шухрат Раззаков

«ЗАМИН.УЗ» муҳаррири