Эрон ўзининг махфий ерости базасини кўрсатди (видео)

Эрон Ислом инқилоби қўриқчилари корпуси мамлакатдаги ҳарбий-денгиз кучларининг махфий ерости базасини намойиш қилди. Бу ҳақда Tasnim хабар берди.

База Форс кўрфази қирғоғида ер остида жойлашган бўлиб, мураккаб ва узун туннеллар тизимига эга. Унинг чуқурлиги 500 метрга етади. Иншоот “яхши ҳимояланган кемалар учун ерости шаҳри” деб таърифланган.

Базанинг Форс кўрфазига бир нечта чиқиш йўллари мавжуд бўлиб, улар кемаларни тезда сувга тушириш имконини беради.

“Бу ердаги кемалар сони ИИҚК ҳарбий-денгиз кучларимизнинг фақат бир қисмини ташкил этади. Энди бу кучлар Форс кўрфази ташқарисидан келадиган таҳдидларга ҳам қарши тура олиш имкониятига эга”, деб таъкидлади корпус раҳбари Ҳусайн Салами.

Бу база Эрондаги бир нечта шунга ўхшаш базалардан биридир. У узоқ масофага ракета учиришга ва узоқ масофадан жанговар ҳаракатларни олиб боришга қодир кемалар учун қурилган эди. “Замин” янгиликларини “Telegram”да кузатиб боринг