Россия Shahed дронлари ёрдамида Харкивга катта ҳужум уюштирди

^{Фото: State Emergency Service of Ukraine/REUTERS}
Россия 1 март, шанбага ўтар кечаси Shahed дронлари ёрдамида Харков ва Харкив областига йирик ҳужум уюштирди. Шаҳарнинг Киев, Шевченко ва Новобавар районларида тўққизта ҳужум қайд этилган, деб хабар берди маҳаллий полиция Telegramʼда.

Дронлардан бири уч қаватли тиббиёт биносига урилди, натижада томда ёнғин келиб чиққан. Қутқарувчилар, полиция, тиббиёт ходимлари ва кўнгиллилар бинодан 64 киши, жумладан 56 бемор ва бир болани эвакуация қилди.

Турар жой бинолари, савдо маркази, дўконлар, ёнилғи қуйиш шохобчаси, автосалон ва бошқа фуқаролик инфратузилма объектлари ҳам зарар кўрган, дея қўшимча қилди Харкив области полицияси. Яна бир қанча жойларда ёнғин содир бўлган.

Ҳуқуқ-тартибот идоралари маълумотларига кўра, учувчисиз учоқнинг зарбалари оқибатида камида етти киши жароҳатланган. Харкив области ҳарбий маъмурияти (ОҲМ)нинг аниқлик киритишича, жабрланганларнинг барчасига воқеа жойида ёрдам кўрсатилган ва уларни касалхонага ётқизиш талаб қилинмаган.

Аввалроқ Харкив икки марта учувчисиз учоқлар ҳужумига учради

27 феврал оқшомида Россия Қуролли кучлари Харкив областининг энергетика тизимига камида 12 та камикадзе дрон билан ҳужум қилди. Уч киши жароҳатланган, дея хабар беради маҳаллий расмийлар.

Эртаси куни тунда Харкивга яна бир йирик учувчисиз учоқлар ҳаво ҳужуми уюштирилди, натижада фуқаролик корхонасида 1500 квадрат метргача бўлган ҳудудда ёнғин содир бўлди. Бунинг оқибатида, шунингдек, Роган районида дроннинг қулаши оқибатида тўрт киши жароҳатланган. “Замин” янгиликларини “Telegram”да кузатиб боринг