Одессада Украина президенти ва НАТО бош котиби учрашди

^{Фото: Украина Президенти матбуот хизмати}
Украина президенти Владимир Зеленский ва НАТО бош котиби Марк Рюттенинг иш юзасидан учрашуви 15 апрель куни Одессада бўлиб ўтди. Бу ҳақда Украина президенти девонхонаси расмий сайтига таяниб Дарё хабар бермоқда.

Владимир Зеленский учрашувда Украинанинг ҳаво ҳужумидан мудофаа тизимлари ва бошқа қурол-яроғларга бўлган эҳтиёжи муҳокама қилинганини маълум қилган.

“Биз Европа ва Америкадаги ҳамкорларимиз билан ҳаво ҳужумидан мудофаа бўйича келишувларимиз амалга ошишига умид қиламиз. Бизга Patriot тизимлари зарур, биз уларни сотиб олиш учун бирлашишга ва маблағ топишга тайёрмиз. Дунёда бундай тизимлар мавжуд ва бизда россияликларнинг баллистик ракеталаридан етарлича ҳимоя бўлиши фақат етакчиларнинг қарорига боғлиқ”, деди у.

^{Фото: Украина президенти матбуот хизмати}
Зеленский нафақат Украинада, балки бутун Европада ҳам барча хавфсизлик мақсадида бирлашиши, кўпроқ қурол ишлаб чиқариши, кўпроқ қўшма мудофаа корхоналарини ташкил этиши зарурлигини таъкидлаган.

Зеленскийнинг сўзларига кўра, Британия, Франция ва НАТОнинг бошқа давлатлари аллақачон хавфсизлик контингенти учун пойдеворни фаол тайёрламоқда ва “бу жараёнда тез ва самарали бўлиш” муҳимдир.

Ўз навбатида, НАТО бош котиби Марк Рютте НАТО Украина билан ёнма-ён туришини таъкидлаган.

“Бизнинг қўллаб-қувватлашимиз шубҳасиздир. НАТО Украинага сиёсий ва бошқа турдаги ёрдам кўрсатишни давом эттирмоқда. Висбадендаги хавфсизлик бўйича машғулотлар орқали биз бир-биримизга янада яқинлашмоқдамиз. Жорий йилнинг дастлабки уч ойида НАТО ҳамкорлари Украинага 20 миллиард евродан ортиқ ёрдам кўрсатди. Биз Украина суверен ва кучли бўлишини ҳамда бундан кейин ҳам ҳар қандай тажовузга қарши тура олишини истаймиз. Бугун мен Трамп урушни тугатиш ва тинчликни таъминлаш учун Украина ва Россия билан музокаралар олиб бораётганини айтдим”, деди Рютте.

“Бу осон эмас, айниқса, бундай зўравонлик шароитида. Лекин барчамиз жаноб Трампни қўллаб-қувватлаймиз. Буюк Британия ва Франциядаги ҳамкорларимиз ҳам Украинада тинчликни таъминлаш учун ўз қадамларини қўймоқда”, дея қўшимча қилди НАТО бош котиби. «Замин»ни Telegram’да ўқинг!