Россияда ишчи кучига бўлган талаб кучаймоқда: мамлакатга янги мигрантлар оқими кириб келяпти

Ҳозирги вақтда Россияда ишчи кадрларга бўлган эҳтиёж кескин ортиб бораётгани сабабли, мамлакатга аввал кузатилмаган даражада мигрантлар оқими бўлиб келмоқда. Бу ҳақда Times нашри ўзининг телеграм-канали орқали ёзиб чиқди.

Нашрнинг таъкидлашича, Россияга ҳозирда нафақат анъанавий ҳисобланган Марказий Осиё давлатларидан, балки Африка қитъаси, Лотин Америкаси ҳамда бошқа Осиё мамлакатларидан ҳам ишчи кучлари оммавий равишда кириб келмоқда. Бу мамлакатлардан келган ишчилар Россиянинг ўлчовлари бўйича арзимас ҳисобланган маошлар эвазига ҳам меҳнат қилишга тайёр эканликларини билдирмоқда.

Шу пайтгача Россия ўзининг меҳнат бозоридаги бўшлиқларни кўпинча Марказий Осиёдан келган мигрантлар ҳисобига қоплаб келар эди. Аммо ҳозирда бу минтақадан келган ишчиларнинг сони Россиядаги ишчи кучи эҳтиёжини қондириш учун етарли бўлмаяпти. Натижада, Россия мигрантларни жалб қилиш географиясини кенгайтиришга мажбур бўляпти.

Россия Федерацияси Меҳнат вазирлиги тақдим қилган маълумотларга кўра, 2030 йилга бориб мамлакатда ишчи кадрларга бўлган умумий эҳтиёж қарийб 11 миллион кишини ташкил этади. Бу кўрсаткич бугунги кунда мавжуд бўлган ишчи кучлари сонидан анча юқори. Мазкур ҳолат Россиянинг иқтисодий ҳаётидаги энг жиддий муаммолардан бири бўлиб қолмоқда.

Айни вақтда мамлакат меҳнат бозорига кириб келаётган янги мигрантлар, ўз навбатида, Россия иқтисодиётининг турли соҳаларида иш билан банд бўлиш имкониятига эга бўлмоқда. Уларнинг асосий қисми қурилиш, саноат, хизмат кўрсатиш ва қишлоқ хўжалиги соҳаларида меҳнат қилмоқда.

Мутахассисларнинг фикрича, Россия ушбу катта кўламдаги кадрлар танқислигини ҳал қилиш учун миграция сиёсати ва меҳнат бозоридаги қоидаларни қайта кўриб чиқиши зарур бўлади. «Замин»ни Telegram’да ўқинг!